QR vitse-premeri Roman Skliardyń qatysýymen ótken kezdesýde qoljetimdi turǵyn úi qurylysynyń kólemin arttyrý men 2020-2021 jyldary elordanyń problemalyq nysandarynyń máselesin sheshý talqylandy, dep habarlaidy qalalyq ákimdiktiń baspasóz qyzmeti.
Kezdesýge, sondai-aq, memlekettik organdardyń, turǵyn úi qurylys jinaq bankiniń jáne qurylys kompaniialarynyń ókilderi qatysty. Premer-Ministrdiń orynbasary Roman Skliar elimizde «Nurly Jer» baǵdarlamasy sátti júzege asyrylyp jatqanyn atap ótti. Ótken jyly 13 mln 130 myń sharshy metr turǵyn úi salyndy.
«Qoljetimdi turǵyn úi segmentin salý úshin barlyq qajetti rezervter bar. Mysaly, «Nurly Jer« baǵdarlamasyna ózgerister engizildi. Turǵyndar tarapynan suranys bar, turǵyn úi qurylysy qarqynyn ulǵaitý qajet», - dedi ol.
Elorda ákimi Altai Kólginov ótken jyly 2020-2021 jyldarǵa arnalǵan turǵyn úi qurylysynyń kólemin arttyrý men Memleket basshysynyń tapsyrmalaryn oryndaý aiasynda úlestik qurylys nysandarynyń máselesin sheshý boiynsha daiyndyq jumystary qolǵa alynǵandyǵyn aitty.
«Turǵyn úi máselesi-basty, mańyzdy baǵyttardyń biri. Ótken jyly kezekte turǵan 2900 azamat páter aldy. Memleket basshysynyń tapsyrmasyna sáikes biyl qoljetimdi baspana kólemi 3 ese ulǵaisa, 2021 jyly odan da kóp bolmaq. Úi qurylysy kombinatynyń jumysy kómektesedi-memlekettiń qoldaýynyń arqasynda kásiporynnyń jumysy jańartyldy. Úilerdiń sapasyna nuqsan keltirilmei, sharshy metrdiń qunyn azaitýǵa jáne turǵyzý merzimin qysqartýǵa kómektesedi. Birqatar máseleler birlese jumys atqarýdy talap etedi», - dedi A. Kólginov.
2020 jyly jalpy 500 myń sharshy metrden astam turǵyn úi salý josparlanǵan – bul shamamen 8 myń páter. 2021 jyly 8,5 myń páterdi paidalanýǵa berý josparlanyp otyr.
7800-den astam úlesker páter alyp, qujattaryn rásimdei alady. 2019 jyly qabyldanǵan sharalardyń arqasynda 10 nysan paidalanýǵa berildi. (11 úi, 2,5 myń úlesker). Árbir qurylysy uzaqqa sozylǵan nysan boiynsha qadamdyq is-sharalar jospary ázirlendi.
