Byltyr qazaqstandyq biznes EAEO aiasyndaǵy shekteýlerden 100 mln dollardyń tabysyn joǵaltqan, dep habarlaidy QazAqparat.
Ashyq úkimet portalynda ótken onlain konferentsiiada Saýda jáne integratsiia vitse-ministri Janel Kýshýkova osyndai málimet aitty.
«Ókinishke qarai, EAEO aiasyndaǵy integratsiianyń 2021 jylǵy ekonomikalyq áserin aqshalai balamada eseptep shyǵarý ázirge múmkin emes. Bul rette 2020 jyly EAEO ishki naryǵynda qazaqstandyq biznes úshin aýyr sezilgen 8 tosqaýyl joiylǵanyn mysalǵa keltirýge bolady. Osy tosqaýyldardan kelgen shyǵynnyń jalpy quny 100 million dollarǵa baǵalandy. Bul jobalap baǵalaýdyń nátijesinde shyǵarylǵan sandar ekenin túsiný kerek. Shyn máninde tosqaýyldardyń ekonomikalyq áseri 100 mln dollarda kóp te, az da bolýy múmkin», - dedi Janel Kýshýkova Ashyq úkimet portalynyń qoldanýshysyna bergen jaýabynda.
Ministrdiń orynbasary biyl Qazaqstannyń atalmysh odaqqa tóraǵalyq etip jatqanyn eske salyp, sonyń aiasynda kedergilerdi joiýdyń quqyqtyq negizin jáne aqparattyq-taldamalyq súiemeldeýdi jetildirýge kúsh salyp jatqandaryn baiandady.
«Aqpan aiynyń basynda biz kedergilerdi bólý jáne joiý ádisnamasynyń jetildirilgen jobasyn bekittik. Osynyń arqasynda kedergilerdi jikteý men baǵalaý merzimin 2 aiǵa qysqarttyq. Sondai-aq odaqqa múshe memleket qabyldaǵan kedergini tosqaýyl dep tanýdyń jańa tetigin egizdik», - deidi vitse-ministr.
Vitse-ministrdiń sózine qaraǵanda, biznespen tikelei dialog ornatý úshin atalmysh vedomstvo Qazaqstannyń EAEO men Dúniejúzilik saýda uiymyna múshe bolýy taqyrybynda óńirlerde qoǵamdyq qabyldaý ótkizip, osy iske arnalǵan aqparattyq internet-portal qurý josparlanǵan eken.
«Qazaqstandyq eksporttaýshylarǵa aýyr tiip júrgen kedergilerdi joiý týraly is-sharalar jospary bar. Sonymen qatar, EAEO-nyń ishki naryǵyndaǵy kedergilerdi joiý máseleleri jónindegi vedomstvoaralyq jumys toby bekitildi. Byltyrdan bastap kedergilerdi joiý jumystaryna jergilikti atqarýshy organdardy tarta bastadyq. Bul otandyq óndirýshiler tap bolyp otyrǵan problemalardy naqty pysyqtaýǵa múmkindik beredi», - dep túiindedi Janel Kýshýkova.
