2020 jyldyń 2-toqsanynda elimizdegi jumyssyzdyq 10,8 paiyzǵa jetti. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Aǵymdaǵy daǵdarys eńbek naryǵynda basym túrde jumys ýaqytynyń qysqarýy men halyq tabysynyń azaiýyna áser etti. Resmi statistika boiynsha 2-toqsanda jumyssyzdyq deńgeii 5 paiyzǵa deiin artty. Degenmen, ýaqytsha jumyspen qamtylmaǵan adamdar sanynyń ulǵaiýyn eskersek, ol qosymsha 536 myń adam, iaǵni belsendi jumyspen qamtýdan tys qalǵan adamdardyń úlesi 10,8 paiyzdy quraidy. Muny shynaiy jumyssyzdyq desek te bolady», - dedi ministr Májilistegi Úkimet saǵatynda.
Onyń aitýynsha, jumys ýaqytyn paidalaný kórsetkishteriniń tómendeýi baiqalady. Aptasyna 36 saǵattan artyq jumys isteitin adamdar sany 542 myńǵa qysqarǵan.
«Jalpy alǵanda daǵdarys kezinde halyq tabysynyń kúrt tómendeýi oryn almady. Biraq ósý qarqyny ótken jylmen salystyrǵanda edáýir tómendedi. Óz kezeginde halyq tabysynyń quramynda áleýmettik transferler, iaǵni, áleýmettik tólemder úlesi ótken jylmen salystyrǵanda 23 paiyzdan 31 paiyzǵa deiin artqanyn kórýge bolady», - dedi Birjan Nurymbetov
