QR Eńbek jáne halyqty áleýmettik qorǵaý ministrligi 2020 jyldyń 1 qańtarynan bastap ataýly áleýmettik kómek qalai beriletinin túsindirdi, dep habarlaidy "Ult aqparat".
Ministrliktiń baspasóz qyzmetiniń málimetinshe, ataýly áleýmettik kómek burynǵydai tabysy az otbasylarǵa tólenedi. Alaida AÁK taǵaiyndaýdyń jańa tetikteri ár otbasyna jeke tásildi usynady. Negizgi printsip - memleket shynymen kómekke muqtaj adamdarǵa kómektesedi.
«Ataýly áleýmettik kómek – bul járdemaqy emes, tabysy az otbasylardyń qarjylyq jaǵdaiyn jaqsartýǵa jáne daǵdarysty eńserý úshin olardyń resýrstaryn yntalandyrýǵa baǵyttalǵan qiyn jaǵdaiǵa tap bolǵan azamattarǵa memleket tarapynan qoldaý kórsetý», delingen habarlamada.
QR Eńbek jáne halyqty áleýmettik qorǵaý ministrligi Memleket basshysynyń 2 qyrkúiektegi Qazaqstan halqyna Joldaýynda aitylǵan tapsyrmasyna sáikes AÁK usynýdyń jańa tetikterin ázirledi, olar mynalardy kózdeidi:
- AÁK kórsetýge arnalǵan qoldanystaǵy shekti ólshemdi saqtaý, iaǵni, jan basyna shaqqandaǵy ortasha tabysy óńirlik kúnkóris deńgeiiniń 70% -dan az otbasylar ataýly áleýmettik kómek alýǵa júgine alady;
- AÁK otbasynyń barlyq músheleri úshin jan basyna shaqqandaǵy tabystar men kedeilik shegi arasyndaǵy aiyrmashylyq retinde anyqtalady. Osylaisha, tabysy az otbasylardyń balalaryna tólenetin bekitilgen eń tómengi kúnkóris deńgeiiniń 70% mólsherindegi tólemderden alshaqtaý josparlanyp otyr;
- AÁK alatyn otbasylardyń eńbekke qabiletti músheleri jumys isteýge tiis. Olardyń jumysqa ornalasýy úshin Nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasynyń barlyq tetikteri qoldanylady. Eger otbasynyń eńbekke jaramdy múshesi usynylǵan jumystan jáne jumyspen qamtýǵa járdemdesý sharalarynan bas tartsa, onda AÁK tóleý tek oǵan ǵana emes, búkil otbasyna toqtatylady;
- AÁK-tiń ádildigi men ashyqtyǵyn qamtamasyz etý maqsatynda ataýly áleýmettik kómek taǵaiyndaý úshin azamattardyń toqsan saiynǵy ótinishterin qaitadan engizý usynylady. Bul qosymsha qujattardy jinaýdy talap etpeidi. AÁK taǵaiyndaý úshin memlekettik organdardyń derekter qorynda tolyq málimetter bolǵan jaǵdaida tek jeke kýáligin kórsetý qajet;
- otbasynyń materialdyq jaǵdaiyna tekserý júrgizý merzimin 3 kúnnen 7 kúnge deiin ulǵaitý. Qazirgi ýaqytta ministrlik muqtajdyqty anyqtaý kriteriilerin ázirleýde. Otbasy belgilengen kriteriilerge sáikes kelmegen jaǵdaida ýchaskelik komissiia AÁK kórsetýge muqtajdyqtyń joqtyǵy týraly qorytyndy shyǵarady, bul ýákiletti organ tarapynan ony taǵaiyndaýdan bas tartý úshin negiz bolady.
Qoldanystaǵy zańnamaǵa tiisti túzetýler QR Parlamenti Májilisiniń qaraýyna jiberildi.
Esterińizge sala keteiik, Memleket basshysynyń ataýly áleýmettik kómek kórsetýdiń jańa tásilderimen qatar, AÁK tóleý tetikterin túzetý jónindegi tapsyrmasyn oryndaý maqsatynda 2020 jylǵy 1 qańtardan bastap Qazaqstanda barlyq kópbalaly otbasylar úshin olardyń tabysyna qaramastan memlekettik járdemaqy men tabysy az otbasylardan shyqqan balalarǵa arnalǵan kepildendirilgen áleýmettik paket engiziletin bolady.
