2020 jyldan bastap jeke tulǵanyń atyna taýar ákelýdegi shekteý ózgertiledi, dep habarlaidy "Ult aqparat" Memlekettik kirister komitetine silteme jasap.
«2020 jylǵy 1 qańtardan bastap halyqaralyq poshta jóneltilimderimen jiberiletin, sondai-aq tasymaldaýshy jetkizetin jeke paidalanýǵa arnalǵan taýarlardy bajsyz ákelýdiń normasy 200 eýrony jáne 31 kilogramdy quraityn bolatyndyǵyn eske salamyz», delingen habarlamada.
Eske sala keteiik, qazirgi ýaqytta (2019 jyldyń 31 jeltoqsanǵa deiin) Eýraziialyq ekonomikalyq odaqtyń kedendik aýmaǵyna keden bajy, salyqty tólemei ákelinetin jeke paidalanýǵa arnalǵan taýarlardyń normalary bir jeke tulǵanyń atyna kúntizbelik 1 ai ishinde 500 eýro jáne salmaǵy 31 kg quraidy.
Belgilengen normalar asqan jaǵdaida, qundyq jáne/nemese salmaq normalarynan asqan bóliginde qunynan 15 paiyzdyq, salmaqtyń 1 kilogramy úshin keminde 2 eýro stavkasy boiynsha kedendik tólem tólenýi kerek.
Aita keterligi, qazirgi ýaqytta (2019 jyldyń 31 jeltoqsanǵa deiin) kedendik bajdardyń, salyqtardyń biryńǵai mólsherlemeleri qun jáne (nemese) salmaqtyq normadan asyp túsý bóliginde qunynyń 30 paiyzy, biraq 1 kg salmaq úshin 4 eýrodan kem emesti quraidy.
«Mysaly, baǵasy 300 eýro bolatyn internet-dúkenderden tapsyrys berilgen sálemdeme, jolaýshylarǵa arnalǵan kedendik deklaratsiiasyn tapsyrý jolymen, sondai-aq qundyq normasynan asatyn bóliginde kedendik tólemder qunynyń 15%-dyq mólsheri boiynsha kedendik deklaratsiialaýǵa jatqyzylady (iaǵni 100 eýrodan 15%-dyq) nemese jiberiliminiń quny 200 eýrodan aspasa, biraq onyń salmaǵy 35 kg bolsa (iaǵni salmaq normasynan 4 kg asyp tursa), onda 4 kg kedendik baj salyǵy salynady», delingen habarlamada.
