Indýstriia jáne infraqurylymdyq damý ministrligi mamandary 2020 jyldan bastap elimizdegi qandai joldar aqyly bolatynyn, biyl qai jol ýchaskeleri jóndeletinin aityp berdi, dep habarlaidy "Ult aqparat".
Vedomstvonyń málimetine sensek, 2024 jylǵa deiin respýblikalyq jeliniń 11 myńǵa jýyq shaqyrymyn aqyly avtojolmen qamtý kózdelip otyr.
«Aqyly jol jobasyn eki kezeń boiynsha engizemiz. Birinshi kezeń – 2020-2021 jyldar aralyǵynda 6 myń shaqyrym aqyly jol qoldanysqa beriledi. Atap aitqanda, «Batys Eýropa – Batys Qytai» tranzittik dálizi, «Nur-Sultan – Qostanai – Resei shekarasy», «Shýchinsk – Petropavl», «Nur-Sultan – Pavlodar», «Qalbataý – Pavlodar – Resei shekarasy» (Ombyǵa aparatyn jol), «Taskesken – Baqty - Qapshaǵai – Taldyqorǵan», «Atyraý – Oral», «Atyraý – Dossor – Beineý – Aqjigit – Ózbekstan shekarasy» jáne «Aqtaý – Beineý» joldarynyń ýchaskeleri aqyly bolady», - dep atap ótti ministrlikten.
2022-2023 jyldar aralyǵynda qalǵan 5 myń shaqyrym joldy engizýdi kózdeitin ekinshi kezeń júzege asyrylady.
Indýstriia jáne infraqurylymdyq damý ministrligi aldaǵy jyldar qansha shaqyrym jol jóndeletinin de aitty.
Mekemeniń málimetinshe, «Nurly jol» baǵdarlamasy aiasynda 2020-2026 jyldar aralyǵynda uzyndyǵy 10 myń shaqyrymdy quraityn respýblikalyq joldardyń qurylysy men rekonstrýktsiiasy josparlanǵan. Onyń 1373 shaqyrymynda 2020 jyly qozǵalys bastalady.
«Osylaisha, «Ortalyq – Ońtústik» baǵyty boiynsha 311 shaqyrym jol ashylady. «Petropavl – Qorǵan» tasjolynyń 37 shaqyrymy paidalanýǵa beriledi. «Ortalyq – Shyǵys» jobasy boiynsha - 13 shaqyrym, «Qostanai – Denisovka» jolynda – 65 shaqyrym, «Aqtóbe – Qandyaǵash – Maqat» jolynda – 160 shaqyrym jol ashylady. Sondai-aq, 2020 jyly «Atyraý – Astrahan» tasjolynyń 160 shaqyrymy, «Kókterek asýy» jobasy boiynsha – 32 shaqyrym, «Taldyqorǵan – Óskemen» tasjolynda – 384 shaqyrym, «Uzynaǵash – Otar» jolynyń 96 shaqyrymy, «Úsharal – Dostyq» jolynyń 60 shaqyrymy, «Qalbataý – Maiqapshaǵai» jolynyń 155 shaqyrymy qoldanysqa beriledi», - dep túsindirdi ministrlikten.
