2019 jyly Qazaqstannyń ońtústiginen soltústik óńirlerge 2,5 myń otbasy qonys aýdardy. Bul týraly QR Eńbek jáne halyqty áleýmettik qorǵaý birinshi vitse-ministri Erjan Jylqybaev málim etti, dep habarlaidy "Ult aqparat".
«Memlekettik baǵdarlama aiasynda eńbek kúshi artyq ońtústik óńirlerden jumys kúshi tapshy soltústik aýmaqtarǵa qonys aýdarý qarastyrylǵan. Ótken jyly 2,5 myń otbasy qonys aýdardy, bul shamamen 10 myń adamǵa jýyq. Qonys aýdarǵandardyń ishinen 3,5 myń adam nemese eńbekke qabiletti jastaǵy qatysýshylardyń 79 paiyzy jumysqa ornalastyryldy», – dedi birinshi vitse-ministr Ortalyq kommýnikatsiialar qyzmetinde.
Onyń sózine qaraǵanda, Nur-Sultan qalasynan Ekibastuzǵa 242 otbasy baryp, olar bes jylǵa arendalyq baspanamen qamtamasyz etildi. Memlekettik baǵdarlama aiasynda Soltústik Qazaqstan oblysynda 428 úidiń qurylysyna 3 mlrd teńge bólindi.
Ol eńbek resýrstarynyń utqyrlyǵyn yntalandyrý úshin qonys aýdarý kezinde otbasynyń árbir múshesine 93 myń teńge (35 AEK) mólsherinde sýbsidiia, sondai-aq turǵyn úidi jalǵa alýǵa jáne kommýnaldyq qyzmetterdiń aqysyn tóleýge 12 ai ishinde sýbsidiia beriletinin eske saldy.
Aita keteiik, búgingi brifingte QR Eńbek jáne halyqty áleýmettik qorǵaý ministrligi 2019 jylda nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasyn júzege asyrýdyń qorytyndysyn jariialady.
