QR Premer-Ministri Asqar Maminniń tóraǵalyǵymen ótken Úkimet otyrysynda astyq jinaý naýqanynyń qorytyndylary qaraldy, dep habarlaidy "Ult aqparat".
QR aýyl sharýashylyǵy ministri S. Omarov mundaǵy jaǵdai týraly baiandap berdi.
Qazirgi tańda jalpy 15,2 mln ga dándi-daqyl alqabynyń 15,1 mln ga jinalǵan, bul 99,2% quraidy. Ortasha ónim alý 12,6 ts/ga bolǵanda, 19,1 mln tonna astyq bastyryldy.
«Biyl aýa raiynyń jaisyz bolýyna bailanysty biz ótken jylmen salystyrǵanda býnkerlik salmaǵynda 2 mln tonnaǵa kem astyq jinadyq. Aýyl sharýashylyǵy ministrligine nanǵa baǵany turaqtandyrý úshin Azyq-túlik kelisimshart korporatsiiasymen astyqty ýaqytyly satyp alýdy qamtamasyz etýdi tapsyramyn», — dedi A. Mamin.
Úkimet basshysy Qazaqstandaǵy aýa raiynyń erekshelikterin eskere otyryp, jinalǵan astyqty saqtap qalý úshin barlyq sharany qolǵa alý, nan qabyldaý kásiporyndary astyqty saqtaýdy, sondai-aq ylǵal astyqty óńdeý men keptirýdi ýaqytyly qabyldaýdy qamtamasyz etýi qajettigin atap ótti.
Premer-Ministr aýyl sharýashylyǵy qurylymdarynyń kelesi jylǵa jiyn-terim tuqymdaryna qajettiligin jáne olardyń sapasyn tekserýdi qamtamasyz etýdi, jańa jiyn-terim astyǵyn eksporttaý boiynsha daiyndyq jumystary aiasynda logistika máselelerin sheshý boiynsha sharalar qabyldaýdy, sondai-aq, aýyl sharýashylyǵy daqyldarynyń joǵarǵy ylǵaldylyǵyn eskerýmen biylǵy qazan-qarasha ailarynda astyq pen tuqymdy keptirýdi júrgizý úshin oblystarǵa dizeldi otynnyń qosymsha kólemin bólý máselesin qarastyrýdy tapsyrdy.
