2019 jyldyń 1 qańtarynan bastap barlyq dárilik zattar baǵalaryn retteý kózdelgen, dep habarlaidy "Ult aqparat" Densaýlyq saqtaý ministrliginiń baspasóz qyzmetine silteme jasap.
Vedomstvonyń habarlaýynsha, Elbasynyń «Qazaqstannyń úshinshi jańǵyrýy: jahandyq básekege qabilettilik» joldaýyn iske asyrý maqsatynda QR Densaýlyq saqtaý ministrligimen «Dárilik zattar men meditsinalyq buiymdar ainalymy máseleleri boiynsha QR keibir zańnamalyq aktilerine ózgerister men tolyqtyrýlar engizý jónindegi» QR Zań jobasy ázirlendi.
Dárilik zattar baǵalaryn qalyptastyrýdaǵy josparlanyp otyrǵan ózgerister baǵany retteýdiń 4 deńgeiin kózdeidi: óndirýshi, kóterme saýda, bólshek saýda, sondai-aq TMKKK sheńberinde jáne MÁMS júiesinde satyp alý deńgeileri.
Óndirýshiniń baǵasyn tirkeý referenttik elderdiń tutynýshylyq oramynyń baǵasy negizinde júrgiziledi, sondai-aq ústeme baǵanyń regressivtik shkalasy arqyly dárilik preparattardy kóterme jáne bólshektep satý marjasy retteletin bolady.
"Qazirgi tańda atalǵan Zań jobasy QR Parlament Májilisiniń qaraýynda, jaqyn arada ol ekinshi oqylymǵa kirgiziledi jáne QR Parlament Senatyna joldanady. Aǵymdaǵy jyldyń sońyna deiin zańǵa qol qoiý josparlanýda", - delingen habarlamada.
Odan basqa, Ministrlikpen 2017 jyldyń basynan TMKKK sheńberinde ambýlatoriialyq deńgeide turǵyndardy tegin dárilik zattarmen qamtamasyz etý úshin farmatsevtikalyq qyzmetter men dárilik zattar, meditsinalyq buiymdar tizbesin ortalyqtandyrýdy esepke alýmen Biryńǵai distribiýtor tizimi tolyqtai qaita qaraldy.
"Atap aitqanda, ambýlatoriialyq tegin qamtamasyz etý úshin dárilik zattar tizbesi ekonomikalyq jaǵynan tiimdi preparattardy qosý jolymen qaita qaralyp, keńeitildi. Mysaly, S virýstyq gepatitin emdeý úshin qymbat turatyn jáne tiimdiligi tómen (60%) pegilirlengen interferondarmen terapiia tiimdiligi joǵary (98%) emdeý shemasymen (sofosbývir+daklatosvir) almastyryldy, ol emdelgen naýqastar sanynyń 500-den 40 000 adamǵa joǵarylaýyna múmkindik berdi", - dep jazylǵan vedomstvo taratqan habarlamada.
Sonymen qatar, dárilik zattardy shet eldik óndirýshilermen júrgizilgen kelissózder nátijesinde 175 atalymdaǵy meditsinalyq preparattar baǵasy ortasha 23%-ǵa tómendedi, al otandyq óndirýshilermen uzaq merzimdi sharttar aiasynda baǵany tómendetý jónindegi qabyldanǵan mindettilikke sáikes 134 atalymdaǵy dárilik zattar baǵasy 5%-ǵa tómendedi.
Qazirgi tańda dárilik naryq dárihana arqyly dárilik zattardy kommertsiialyq satý jáne tegin meditsinalyq kómektiń kepildik berilgen kólemi sheńberinde tegin dárilik zattarmen qamtamasyz etý bolyp bólinetinin atap ótken jón. Búgingi kúni naryqtaǵy kommertsiialyq satýǵa baǵa túzý rettelmeidi.
