Denis Ten atyndaǵy mánerlep syrǵanaý akademiiasyn 2019 jyly ashý josparlanyp otyr, dep habarlaidy QazAqparat tilshisi.
«Eń aldymen, osy zalda otyrǵan adamdardyń bárine de alǵys aitqym keledi. Bizdiń prezidiýmde kezdeisoq adam joq. Bári de Deniske kómektesip, qiyn kezeńderde qoldaý bildirip, birlese eńbek etken adamdar. Dál osy adamdar bizdiń qorymyzdyń ashylýyna muryndyq bolyp otyr. Tamyzda ashylǵan qor Denistiń josparlary men jobalaryn júzege asyrý úshin qurylǵan. Denis birneshe sala boiynsha eńbek etip, shyǵarmashylyqtyń san túrinde ózin baiqatqan edi. Mine, sondyqtan, qordyń jumysynda birneshe baǵytty erekshelep aldyq», - dedi Oksana Ten Astanada ótken baspasóz máslihatynda.
Onyń aitýynsha, jobalar sheńberinde mýzykalyq diskiler shyǵarý, Denistiń ertegileri men óleńderiniń jinaǵyn basyp shyǵarý kózdelip otyr.
«Álbette, jobalardyń qatarynda kórkem film shyǵarý da josparlanyp otyr. Kóptegen adamdar osy sharýaǵa erekshe nazar aýdardy. «Soqyr mahabbat» filminiń stsenariii bar. Onyń sporttyq mansabynyń basym baǵyttarynyń biri - mánerlep syrǵanaý akademiiasyn qurý bolatyn. Biz bul baǵytta jumys júrgizip jatyrmyz. Onyń ashylýy 2019 jylǵa josparlanyp otyr», - dedi Oksana Ten.
Mánerlep syrǵanaýshynyń anasy atap ótkendei, qor jumysy boiynsha alǵashqy qadamdar jasalyp qoiǵan.
«Biz Almaty men Astana qalalarynda birneshe fotokórme uiymdastyrdyq. Ol sharalardyń bárine de halyqtyń yqylasy erekshe boldy. Memorialdyq taqta Almatyda ashyldy. Onyń ashylýyna aty ańyzǵa ainalǵan Tatiana Tarasova qatysty. Aleksei Iagýdin men Elena Radionovanyń qatysýymen birneshe sheberlik saǵaty ótkizildi», - dedi Oksana Ten.
