Ótken jyly oblysta muqtaj azamattardy áleýmettik jaǵynan qamtamasyz etýge 38 mlrd. teńge baǵyttalǵan. Sonyń 3,5 mlrd. teńgesi Áleýmettik karta sheńberinde kóp balaly jáne az qamtylǵan otbasylardy qoldaýǵa jumsaldy. Bul týraly búgin Taldyqorǵandaǵy B. Rimova atyndaǵy drama teatrynda ótken esepti jiynynda Almaty oblysynyń ákimi Amandyq Batalov aitty.
Baiandamadan belgili bolǵandai, osy sanattaǵy otbasylardan shyqqan 42 myń bala balabaqshalar men mektepterde tolyqtai ystyq tamaqpen qamtylǵan. Joǵarǵy oqý oryndarynda oqý úshin 100 grant bólingen. Taldyqorǵanda 42 myń oqýshy men stýdent, úsh qalada 8 myń kóp balaly ana qoǵamdyq kólikte tegin júredi. 2 277 otbasy gazǵa tegin qosylyp, 22,6 myń otbasynyń úiine ýly gaz datchikteri ornatylǵan. Taldyqorǵanda kóp balaly otbasylarǵa kómek kórsetetin «Januia» ortalyǵy ashyldy.
Biylǵy jyldyń basynan beri ataýly áleýmettik kómek jańa formatta tólenip jatqany belgili. A. Batalovtyń aitýynsha, sonyń nátijesinde kómektiń osy túrimen 14,3 mlrd.teńgege 144,1 myń adamdy qamtý josparlanǵan (2019 jyly - 30,7 mlrd.teńgege 257,5 myń adam).
- Bizdiń maqsatymyz – jumysqa qabiletti azamattardy jumyspen qamtýdyń belsendi sharalaryna tarta otyryp, olardy AÁK alýshylar qatarynan shyǵarý. Ol úshin nátijeli jumyspen qamtý jáne jappai kásipkerlikti damytýdyń «Eńbek» baǵdarlamasyn júzege asyrýǵa 10 mlrd. teńge bólindi. Bul sharalarmen 14 myń ózin ózi nátijesiz jumyspen qamtyǵan jáne jumyssyz azamat tartylady, - dedi Almaty oblysynyń ákimi.
Almaty oblysy ákiminiń baspasóz qyzmeti
