Jastar – kez kelgen memlekettiń eń belsendi múshesi. Búgingi jastar – egemendi eldiń erteńgi úmiti, ata-babamyz san jyldar armandaǵan táýelsizdigimizdi kóziniń qarashyǵyndai saqtaityn urpaq jalǵasy.
Táýelsiz memleketimiz jastardyń rýhani, mádeni bilim alyp, kásibi tolyqqandy damýy úshin barlyq jaǵdailardy jasap otyr. Búgingi kúni Elbasy Joldaýynda aitylǵan jastar qamqorlyǵyna qatysty kóptegen irgeli jobalar júzege asyrylýda. «Rýhani jańǵyrý» baǵdarlamasy men «Bes áleýmettik bastama» sonyń aiǵaǵy bola alady.
Elbasy ár jyldardaǵy óz Joldaýlarynda «jastar men otbasy institýtyn qoldaý – memlekettik saiasattyń basymdyǵyna ainalýy tiis» ekendigin únemi atap kórsetedi. «Jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin» basty nazarda ustaidy.
Elbasynyń jastardy qoldaýǵa qatysty aitylǵan oilarynyń kórinisi biylǵy jyldyń Jastar jyly bolyp bekitilýine negiz boldy. Iá, Tuńǵysh Prezidentimiz N.Á. Nazarbaev 2019 jyldy «Jastar jyly» dep belgiledi. Bilimdi, sanaly urpaq qana el bolashaǵy bola alatyndyǵyn atap aitqan basshymyz búgingi jastarǵa zor mindet júktep otyr.
El úmitin er aqtar. Sózsiz, búgingi jańa býyn jas talap kúsh-qairaty boiynda bar kezde eli, ulty úshin qyzmet jasaýǵa mindetti. Óz Otanyn álemniń eń damyǵan elderiniń qataryna qosý - bilikti, imandy, sanaly urpaqtyń qolynda. Elbasynyń joldaýynda aitylǵan keleli ideialardy júzege asyrýda ál-Farabi atyndaǵy QazUÝ jastary da belsene eske kiristi. Osy joba negizinde ál-Farabi atyndaǵy QazUÝ-da «Jastar forýmy» ótti.
Forýmǵa qatysqan QazUÝ stýdentteri de Elbasy úmitin aqtaýǵa, óz múmkindikterin kórsetip, tyń bastamalarǵa jol ashatyndyǵyna senim bildirdi. Ál-Farabi atyndaǵy QazUÝ – qazirgi tańda kóptegen innovatsiialyq jobalardyń uiymdastyrýshysy. Oqý ordasy sapaly bilim berýmen qatar, stýdentterdi qazirgi zamanǵa sai básekege qabiletti maman, bilimdi, daryndy hám ultjandy tulǵa retinde qalyptastyrý jolynda jańa jobalardy júzege asyrýǵa kirisip ketti.
QazUÝ dotsenti Satkenova J.B.
