2019-2021 jyldary «Jastar tájiribesi» jobasymen 30 myń jas qamtylady. Bul týraly búgin Májilistegi Úkimet saǵatynda QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Qazaqstandaǵy áleýmettik liftilerdiń tiimdiligin arttyrýdyń mańyzdy tetikteriniń biri – bul «Jastar tájiribesi» jobasy. Ol jumys izdeýshi jastarǵa qajetti tájiribe alýǵa jáne áleýetti jumys berýshimen bailanys ornatýǵa kómektesedi. Jobanyń mehanizmi óte qarapaiym: JOO túlegi eńbek birjasynda jumyssyz retinde tirkeledi. Al jumyspen qamtý bólimderi olardy naqty beiindegi mamandar qajet etetin kompaniialar men memlekettik organdarmen bailanystyrady. Mundai tájiribeden ótýshige biýdjet esebinen 6 ai boiyna 60 myń teńgeden astam mólsherde qarajat tólenedi. Bul óte jaqsy tájiribe», - dedi ol.
Ministrdiń aitýynsha, 2019-2021 jyldary jobaǵa qatysýshylar sanyn 30 myńǵa deiin ulǵaitý kózdelgen.
«Postkeńestik aýmaqta bul – teńdesi joq joba. Buǵan uqsas tájiribe tek Eýroodaq elderinde bar. Sonymen qatar, «Diplommen – aýylǵa» baǵdarlamasy boiynsha mamandarǵa beriletin birjolǵy járdemaqy kólemi 70-ten 100 ailyq eseptik kórsetkishke deiin ulǵaityldy. Budan basqa, 3 million 700 myń teńgege deiin turǵyn úi satyp alýǵa biýdjettik kreditter berý qarastyrylǵan», - D.Abaev.
