2018 jyly «Jolaýshylar tasymaly» AQ 17 mln 719 myń adamǵa qyzmet kórsetti. Bul týraly atalǵan kompaniianyń baspasóz qyzmeti málim etti, dep habarlaidy "Ult aqparat".
Bul turǵyda memleket ishindegi jáne elimiz aýmaǵy arqyly ótken tranzittik jolaýshylar eskerilgen. 2017 jylmen salystyrǵanda 500 myń jolaýshy kem tasymaldandy. Osy oraida 2017 jyly EKSPO kórmesi kezinde temirjol qyzmetin paidalanǵandar kóbirek bolǵanyn atap ótken jón.
Kompaniianyń habarlaýynsha, ótken jyly «Astana-Túrkistan», «Qaraǵandy-Tomsk» baǵyttary ashyldy. Sonymen qatar, biyldyń basynda «Almaty-Túrkistan» poiyzy jańa baǵdar boiynsha jolaýshylar tasymalyn bastady.
«Qyzmet kórsetý sapasyn jaqsartý turǵysynda jolserikter úshin úshinshi býyndaǵy qosymsha 1 500 mobildik terminal iske qosyldy. Búginde 2 400-ge jetken osy terminal arqyly jolaýshylardy poiyzǵa otyrǵyzý rásimderi jeńildetildi», - delingen «Jolaýshylar tasymaly» kompaniiasynyń málimetinde.
