Búkilálemdik týristik uiymnyń (UNWTO) bas hatshysy Zýrab Pololikashvili Nur-Sultan qalasynyń týristik áleýeti týraly pikir bildirdi, dep habarlaidy QazAqparat.
«Men Nur-Sultanǵa alǵash ret kelip otyrmyn. 20 jyl buryn munda kartop egilgen dala jatyr edi. Al qazir óńirdegi eń zamanaýi qalada otyrmyz. Ministrleri men ákimderi týrizmdi talqylaityn oryndar óte az. Búginde týrizm qarqyndy damyp keledi jáne alýan túrli qyzyqty oryndarmen birge ózekti máseleler de týyndaýda», - dedi UNWTO bas hatshysy búgin elordada bastalǵan Búkilálemdik týristik uiymnyń VIII jahandyq sammitinde.
Onyń aitýynsha, 20 jylda Nur-Sultan qalasynyń ósip-damýy sáýlettik kelbet pen aqyldy infraqurylymdy josparlaýdyń, júzege asyrýdyń naqty mysaly bola alady.
«Sońǵy jyldary Qazaqstan Ortalyq Aziiadaǵy beibitshilik pen damý baǵytyn ustandy. Munda búkil álemniń týristeri úshin aýqymdy ilgerileý boldy. Nur-Sultan «aqyldy» baǵytta damyp keledi. «Aqyldy qalalar» adamdardyń ómirine jaqsy yqpal etip qana qoimai, týristerge de tamasha áser beredi. Týrizm sektory qoǵammen ózara bailanysta bolýy tiis. Al biz týrizmniń ekonomika damýyndaǵy rólin túsindirýimiz kerek. Tájiribe almasyp, týrizm salasyndaǵy máselelerdi sheshkimiz keledi», - dedi Z. Pololikashvili.
Aita keteiik, 10-12 qazan kúnderi elordada Búkilálemdik týristik uiymnyń (UNWTO) qala týrizmi jóninde VIII jahandyq sammiti ótedi. Onda aqyldy qalalardy damytý arqyly qalanyń ózekti máselelerin sheshý, qalany basqarý, turaqty damý, innovatsiialar men tehnologiialar taqyryptary talqylanady.
