Elordada 20 sáýirden bastap qaita ashylatyn kásiporyndardyń jumys algoritmi jariialandy, dep habarlaidy QazAqparat.
Bul týraly Nur-Sultan qalasy Taýarlar men qyzmetterdiń qaýipsizdigi men sapasyn baqylaý departamenti jumys orny men kommýnikatsiialyq nysandardaǵy juqpaly aýrýlar boiynsha qadaǵalaý bóliminiń basshysy Gúlnar Qalieva aityp berdi.
«Qurylys nysandarynyń jumysy táýlik boiy, al ónerkásip kásiporyndary, óndiris oryndarynyń jumysy - 8:00-18:00 aralyǵynda júrgizilýi tiis. Ekinshiden, ákimshilik bólim, esepshiler, ekonomister syndy tehnikalyq protseske qatyspaityn, úiden jumys istei alatyn qyzmetkerlerdi qashyqtan jumys rejimine aýystyrý qajet», - dedi G. Qalieva onlain brifingte.
Sonymen birge, óndiristik protsestegi barlyq qyzmetkerdiń qaýipsizdigi qamtamasyz etilýi kerek.
«Qoǵamdyq kólik ýaqytsha toqtaǵandyqtan, óndiris oryndaryna jumysshylar arnaiy kólikpen jetkizilýi tiis. Qorǵanys maskasy joqtar jumys aýmaǵyna kire almaidy. Kei jerlerde qolǵaptyń da bolýy mindettelgen. Jumysshylar eń aldymen baqylaý-ótkizý beketinde dene qyzýyn ólshetedi. Munda denege janaspaityn termometr apparattary alynýy tiis. Dene qyzýy baiqalǵan adamdar dereý oqshaýlanyp, jedel járdem qyzmeti shaqyrylýy tiis», - dedi G. Qalieva.
Eske sala keteiik, QR Prezidenti janyndaǵy Tótenshe jaǵdai rejimin qamtamasyz etý memlekettik komissiiasy búginnen bastap Nur-Sultan jáne Almaty qalalarynda jumysyn bastaityn kásipkerlik sýbektilerdiń tizimin bekitti.
Tizimde ónerkásiptik kásiporyndar, qurylys jáne jol-qurylys salalarynyń kompaniialary, iri qurylys dúkenderi, kólik, qoima kompaniialary, aýyl sharýashylyǵy maqsatyndaǵy servistik kompaniialar, avtosalondar, TQS, avto jýý, dóńgelek aýystyrý servisi, avtobólshekter dúkenderi, himiialyq tazalaý, keńse tehnikasyn jóndeý jáne ekinshi deńgeili bankter bar.
