Túrkistan oblysynda aýa raiynyń kúrt ózgerip, tolassyz jaýǵan jaýyn-shashynnyń arty burqasyn daýyl men qarǵa ulasyp, saldarynan Báidibek, Otyrar, Ordabasy aýdany men Kentaý jáne Arys qalasynyń keibir eldi mekenderi ishinara jaryqsyz qalǵan edi. Zardap shekken Arys pen Kentaý qalasynda jaǵdai turaqtaldy. Kentaý qalalyq jylý elektr stansasy iske qosylyp, elektr jelileri jóndeldi. Bul týraly QazAparat ákimdiktiń baspasóz qyzmetine silteme jasap habarlaidy.
Al, qalǵan úsh aýdanda elektr jelilerin qalpyna keltirý jumystary áli de jalǵasýda. Aýa raiynyń qolaisyzdyǵynan elektr symdary úzilip, 2 myńnan astam elektr baǵan qulaǵan. 20 myńnan astam abonent jaryqsyz qalǵan.
«Sirek kezdesetin qubylys. Óte qatty jańbyr, jel, muz, aiaz. Saldarynan oblysta 2 myńnan astam elektr baǵanalary qulady. Soǵan bailanysty is-shara jasaýymyz kerek»,-dedi oblys ákimi Ómirzaq Shókeev apparat otyrysynda.
Tabiǵattyń tosyn minez tanytýynan oryn alǵan apatty jaǵdaiǵa bailanysty shtab qurylyp, máseleni oblys ákimi Ómirzaq Shókeev óz baqylaýyna alǵan bolatyn. Oblys basshysy zardap shekken aýdan ákimderine qalpyna keltirý jumystaryna atsalysýdy tapsyrdy.
Jiynda sóz alǵan «Ońtústik Jaryq Tranzit» kompaniiasynyń basshylyǵy Ordabasy aýdanyndaǵy jaǵdai jaqyn arada turaqtalatynyn jetkizdi. Al, Otyrar men Báidibek aýdandarynda qaita qalpyna keltirý jumystary bir aiǵa sozylmaq.
«Bir ai degendi estimeitin bolaiyn. Bir aptanyń ishinde bárin ornyna keltirý kerek»,-dep kesip aitty Ómirzaq Estaiuly.
Sońǵy eki táýlikten kebir tabiǵat apatynan bolǵan jaǵdai boiynsha qalypqa keltirý jumystary kúni-túni júrgizilip jatyr. Oqiǵa oryndarynda jaryq berýshi kompaniianyń 20-dan astam brigadasy men 100-den astam adamy, 30 tehnikasy jumyldyrylǵan.
