2 myńnan astam almatylyq oqýshy onlain formattan dástúrli oqytý formatyna oraldy. Bul týraly BǴM habarlady.
Esterińizge sala keteiik, jańa oqý jylynyń basynda Almatydaǵy epidemiologiialyq jaǵdaiǵa bailanysty ata-analarǵa oqytý formatyn tańdaý múmkindigi berildi. Sol kezde bilim alýshylardyń arasynda onlain formatty tańdaǵandardyń sany az boldy. Iaǵni, oqýshylardyń tek 5,6%-y, iaǵni 300 myńnan astam oqýshynyń tek 17 myńnan kem emes bóligi onlain formatta oqýǵa nietti boldy.
Epidahýaldyń jaqsarýyn baqylai otyryp, eki myńnan astam oqýshynyń ata-anasy qashyqtan oqytý formatynan bas tartyp, balalaryn mektepke jiberdi.
«Meniń nemerem biyl birinshi synypqa bardy. Oryn alǵan epidjaǵdaiǵa alańdap, onlain oqytý formatyn tańdadyq. Alaida, nemerem úide otyrmai, synyptastarymen jáne muǵalimdermen aralasqysy keledi. Báribir de, balalarymyz kóshede oinap, dúkenge jáne qonaqqa barady, úiirmelerge qatysady. Sondyqtan biz dástúrli oqytý formatyn tańdadyq. Biz qashyqtan bilim alatyn bala erinshektik tanytyp, nazary basqa nárselerge aýatynyn, qosymsha basqa da istermen ainalysatynyn ári oqý materialyn jetkiliksiz deńgeide meńgeretinin túsindik. Pandemiia qashan aiaqtalatyny belgisiz. Indettiń aiaqtalýyn kútip, bilim sapasyn joǵaltyp almaǵanymyz mańyzdy», – dep atap ótti Almaty qalasynyń turǵyny Gúlbahar Valieva.
Ata-ana Gúlinur Asanova dástúrli oqytý formatyn tolyq qoldaidy jáne basqa da ata-analarǵa balalardy oflain oqytýǵa keńes beredi.
«Meniń balalarym №101 mektep-gimnaziiasynda dástúrli formatta bilim alady. Biz basqa balalardyń mektepke baryp júrgenin, sanitarlyq normalar barynsha qamtamasyz etilip jatqanyn kórip otyrmyz. Sondyqtan biz balalardy óz qurdastarynan qalyp qalmaýlary úshin olardy mektepke jiberýge sheshim qabyldadyq», – dep atap ótti ata-ana Gúlinur Asanova.
Almaty qalasy ákimdigi bilim basqarmasynyń basshysy Lázzat Jylqybaeva qalada 300-ge jýyq mektep bar ekenin atap ótti. Oqýshylardyń jalpy sany boiynsha balalardyń syrqattaný paiyzy oqý jyly bastalǵanǵa deiingi syrqattaný deńgeiimen salystyrǵanda birneshe ese tómen. Mektepterde balalardyń densaýlyǵyn qorǵaýdy qamtamasyz etý úshin keshendi sanitarlyq sharalar qabyldandy. Ikemdi sabaq kestesi qurylyp, bastaýysh, orta jáne joǵary synyp oqýshylary úshin qosymsha aýysymdar men ártúrli ýaqytta úzilister uiymdastyryldy. Oqýshylardyń bir kabinetten ekinshi kabinetke aýysýyna tyiym salyndy. Sabaqtar «bir synyp – bir kabinet» qaǵidaty boiynsha júrgiziledi. Muǵalimder men ata-analar arasynda sanitarlyq talaptardy saqtaý boiynsha túsindirý jumystary júrgizilip jatyr.
