Qurban ait meiramynda Qazaqstanda onlain qurbandyqqa tapsyrys berýshilerdiń sany artty. Bul týraly Qazaqstan Musylmandary dini basqarmasynyń tóraǵasy, elimizdiń Bas múftii Naýryzbai Qajy Taǵanuly málim etti, dep habarlaidy "Ult aqparat".
Qazaqstan Musylmandary dini basqarmasynyń málimetine súiensek, el boiynsha 2500 adam onlain qurbandyq shalýǵa tapsyrys bergen jáne bul túske deiingi ǵana kórsetkish. Qurbandyq shalýdyń jańa formatyn tańdap, tapsyrys berýshilerdiń sany artyp keletin kórinedi.
Búgin elimizdiń bas múftii elorda mańyndaǵy qurbandyq shalýǵa arnalǵan oryndardy aralap, onyń barysyn baqylap shyqty. Ár tapsyrysty Qazaqstan Musylmandary dini basqarmasynyń ókilderi resmi tirkep, onyń oryndalýyn basqarma mamandary jiti qadaǵalaidy.
«Qazaq eli árqashan da qurbandyq shalǵan, bul dástúrimizge sai qalyptasqan dúnie. Kez kelgen kisi saparda nemese syrtta júrse de bul dástúrdi umytpaǵan. Degenmen qazirgi ýaqytta qalalyq turǵyndarǵa kishkene qiynǵa soǵady iaǵni qala syrtyndaǵy mal bazarǵa barýy kerek, mal tańdaýy tiis degen siiaqty. Osy oraida qurbandyq shalyp, qol ushyn sozamyn degen jandar ony onlain túrde iske asyra alady. Sonymen qatar onlain qurbandyq shalý dástúrin biz áli de jetildire túsemiz jáne ony aldaǵy ýaqytta tek Qurban ait meiramynda ǵana emes kez kelgen sátte qoldaný múmkindigi bolady. Jalpy baiqaǵanymyzdai onlain qurbandyqqa tapsyrys berýshilerdiń sany artyp keledi», - dedi elimizdiń Bas múftii Naýryzbai Qajy Taǵanuly.
Onyń aitýynsha, onlain qurbandyq shalýǵa tapsyrys kóbinese Nur-Sultan men Almaty qalalarynan túsip jatyr. Jalpy onlain qurbandyq shalý tájiribesi Túrkiia, BAÁ jáne Malaiziia elderinde keńinen taralǵan.
