Kópbalaly otbasylarǵa baspanany 2-3 paiyzdyq nesiemen berý sharalary mamyrda bastalady. Bul týraly Parlament Májilisinińi jalpy otyrysynda belgili boldy, dep habarlaidy QazAqparat tilshisi.
«Elbasy kópbalaly otbasylardy qoldaý sharalaryn kúsheitý úshin Turǵyn úi qurylys jinaqtary júiesi arqyly jyldyq 2-3 paiyzben turǵyn úi qaryzyn berýdiń jeńildetilgen tetigin ázirleýdi de tapsyrdy. Osyǵan bailanysty jyldyq eki paiyzben baspana qaryzyn alý úshin qandai sharttar kózdelgen? Sonymen kópbalaly otbasylar úshin jeńildikti turǵyn úi qaryzyn berý qashan bastalady?», - dep surady depýtat Baqytbek Smaǵul.
Óz kezeginde «Qazaqstannyń turǵyn úi qurylys jinaq banki» AQ basqarma tóraǵasynyń orynbasary Janar Jubaniiazova qazirgi ýaqytty bul máseleniń qarjylyq negizdemesi jasalǵanyn atap ótti.
«Qazirgi tańda ol ekonomikalyq saraptamadan ótip jatyr. Sodan keiin qaitadan memlekettik-jekeshelik áriptestik ortalyǵyna engizemiz. Ulttyq ekonomika ministrligi maquldaǵannan keiin, barlyq tiisti qujattardy rásimdeimiz», - dedi ol.
J. Jubaniiazovanyń aitýynsha, ákimdikter tizimde turǵandar aiasynda kópbalaly analardyń jáne de múgedek balalary bar otbasylardyń eki paiyzdyq nesiege baspana alý múmkindigi boiynsha Turǵyn úi qurylys jinaq bankine joldama beredi.
«Sol joldama boiynsha osy otbasylar bizdiń bankten nesie alý múmkindigine ie bolady. Bizdiń oiymyzsha, mamyr aiynyń aiaǵyna taman nesie berýdi bastaimyz», - dedi ol.
Aita keteiik, QR Tuńǵysh Prezidenti Nursultan Nazarbaev áleýmettik jaǵynan az qamtylǵan azamattarǵa 2 protsenttik ipoteka berý máselesin qarystyrýdy tapsyrǵan bolatyn. Atalǵan nesie naqty úsh kategoriiaǵa berilýi kerek. Olar - kópbalaly otbasylar, tolyq emes otbasylar jáne múgedek balalary bar otbasylar.
