Búgin QR Úkimeti alańynda ótken baspasóz máslihatynda «Qazaqstannyń turǵyn úi qurylys jinaq banki» AQ Basqarma tóraǵasy Lázzat Ibragimova áskeri qyzmetshilerge arnalǵan «Áskeri baspana» baǵdarlamasynyń júzege asyrylýy týraly aityp berdi, dep habarlaidy "Ult aqparat".
2018 jyly Turǵyn úi qurylys jinaq banki zańnama ózgergennen keiin áskeriler baspana satyp alý úshin 70 myń arnaiy shot ashty. Bul shottardaǵy aqshaǵa qol suǵylmaidy jáne áskeri qyzmetkerlerdiń boryshtaryna bailanysty qandai da bir nesie tólenbegen jaǵdaida tutqynǵa alynbaidy.
2018 jyldyń shilde aiynda «Áskeri baspana» baǵdarlamasy iske qosyldy. Bank páter satyp alý úshin áskeri qyzmetshilerge jeńildik sharttaryn usyndy: jyldyq syiaqy mólsherlemesi 6%-dan 8%-ǵa deiin, bastapqy jarna — 5%-dan 20%-ǵa deiin. Qaryzdy kóp ball jinaǵan úmitkerler alady. Upailar qyzmettiń árbir tolyq aiy úshin esepteledi. Kim uzaǵyraq qyzmet etse, sonyń múmkindigi joǵary bolady.
«Áskeri baspana» baǵdarlamasynyń sharttary boiynsha páter qunynyń 5% ǵana jinaǵan áskeri qyzmetshiler jyldyq 7% stavka boiynsha nesie ala alady. Shart boiynsha páterdi tek bastapqy naryqta satyp alýǵa bolady: páter qunynyń 20%-yn jinaǵandar qurylys salýshydan jyldyq 6%-ben jańa turǵyn úi satyp alýǵa nesie rásimdei alady. Ekinshi naryqta turǵyn úi satyp alǵysy keletin áskeri qyzmetshiler jyljymaityn múlik qunynyń 20%-yn engizýi tiis, al nesie boiynsha jyldyq mólsherleme 8%-dy quraidy.
L. Ibragimovanyń aitýynsha, «Qazaqstannyń turǵyn úi qurylys jinaq banki» AQ arnaiy ázirlengen askeri.baspana.kz saity arqyly 13 myń ótinish tústi. Onyń ishinde 5,5 myń áskeri qyzmetshi nesie boiynsha oń sheshim aldy, qujattarǵa qol qoiylyp, qazirgi ýaqytta olar páter izdestirýde.
2250 adam TQJB-dan qoljetimdi nesie alyp, óz páterlerine qonystandy. 250 áskeri qyzmetshiniń qujattary bankte qaraýda jatyr.
«2019 jyldyń 1 sáýirine deiin nesie boiynsha oń sheshim alǵan 5,5 myń áskeri qyzmetkerdiń barlyq qujattaryn qarap, ekinshi baǵdarlamany bastaýdy josparlap otyrmyz», — dedi L. Ibragimova.
«Qazaqstannyń turǵyn úi qurylys jinaq banki» AQ Basqarma tóraǵasy BAQ ókilderiniń suraqtaryna jaýap bere kele, onlain rejiminde qyzmet kórsetý boiynsha júrgizilip jatqan jumystar týraly da aitty.
«Nurly jer» baǵdarlamasy boiynsha salynyp jatqan barlyq nysandar týraly qazaqstandyqtar baspana.kz saity arqyly bile alady. Portalda qoljetimdi sharshy metrge úmitker páterdi satyp alǵysy keletin qalany tańdap, qandai nysandar salynatynyn, ótinishterdi qabyldaý retin bilip, unaǵan páterdi tańdap, turǵyn úidi satyp alýshylar pýlyna qatysýǵa ótinim bere alady.
«Jyl saiyn salymshylardyń sany ósýde: bizde 1,2 mln salymshy bar, al 3 jyl buryn olardyń qatary 600 myń ǵana bolǵan edi. Alaida osyǵan qaramastan banktegi adamdar sany ulǵaiyp jatqan joq. Sondyqtan sońǵy 3 jyl ishinde biz barlyq biznes-protsesterdi avtomattandyrýǵa basa nazar aýdaramyz», — dedi L. Ibragimova.
Birinshiden, keńesshini úige shaqyrý múmkindigi bar jáne ol óziniń arnaiy plansheti arqyly úiińizge kelip depozit ashyp bere alady. Ekinshiden, salymshylar kez kelgen banktiń kartochkasynan depozitti esh komissiiasyz soma mólsherine qaramastan tolyqtyra alady. Avtomattandyrýdyń úshinshi kezeńi-elektrondyq portal arqyly qujattardy berý. 2018 jyl boiy ótinimderdi jinaý, páterlerdi bólý jáne basqa da protsester JTQJB internet-bankingimen bailanysty baspana.kz portaly arqyly júrgizildi.
«Biz aldyn ala biliktilik boiynsha úlken jobany júzege asyrýdy josparlap otyrmyz. Kóptegen salymshylardy tabysy aiyna 100-120 myń teńge bolǵanda olar qandai somaǵa úmittene alatyny tolǵandyrady. “Aldyn ala biliktilik” institýty 2019 jyldyń basynda jumys isteidi jáne árbir salymshyǵa bankte qaryz qandai somaǵa maquldanýy múmkin ekendigi týraly aqparat alýǵa múmkindik beredi», — dep túsindirdi spiker.
Salymshynyń ortasha jasy-36 jas. 150 myń balalar depoziti 0-18 jas aralyǵynda ashyldy. L. Ibragimovanyń aitýynsha, TQJB qyzmetin bir ret paidalanǵan adamdar artyqshylyqtardy túsine otyryp, bala týǵannan bastap qarjy jinai bastaidy. Árbir úshinshi salymshy 18-29 jas aralyǵyndaǵy adamdar, bul spikerdiń aitýynsha, basym topqa jatady.
«Jastar (eskertý. – 2019 jyldy Memleket basshysy Jastar jyly dep jariialady) jyly jas otbasylar úshin ár-túrli bastamalardy usynatyn bolamyz. Baǵdarlamany bastapqy naryqta ǵana emes, ekinshi naryqta da qarastyryp, onyń keńeiýine qajet quraldardy saralap qarastyramyz. Óitkeni, biz salymshylardyń túrli segmentterin zerdelei kele, biz halyqtyń ár bóliginiń óz qajettilikterin baiqadyq. Basynda adamdar baspanaly bolǵysy kelip, bir bólmeli páterdi satyp alǵysy keledi. 3-4 jyldan keiin balalary paida bolǵan soń turǵyn úi kólemin ulǵaitý týraly ótinish bildiredi. Bul ómirlik tsikl óte mańyzdy, biz otbasynyń árbir kezeńinde salymshylardyń qajettiligin qanaǵattandyra alatyn baǵdarlamalardy ázirleýge tyrysamyz», — dep túiindedi sózin bank basqarmasy.
