Elimizde qatty jeldiń saldarynan 194 eldi meken elektr qýatynsyz qaldy. Bul týraly QR Tótenshe jaǵdailar ministrliginen málim etti, dep habarlaidy QazAqparat.
Vedomstvo málimetinshe, elimizdiń birqatar óńirinde qatty jeldiń saldarynan 4 qalada (Atyraý, Taldyqorǵan, Tekeli, Pavlodar qalalarynda) 70 133 abonent jáne 6 oblysta (Almaty, Atyraý, Aqmola, Qaraǵandy, Soltústik Qazaqstan jáne Pavlodar oblystary) 194 eldi meken elektr qýatynsyz qaldy.
«Ótken táýlikte qutqarý bólimsheleri Nur-Sultan qalasy, Aqmola, Aqtóbe, Qaraǵandy, Qostanai oblystarynda 814 adamdy, onyń ishinde 101 bala jáne 3 júkti áieldi qutqardy jáne evakýatsiialady. Avariialyq-qutqarý jumystaryna TJM, IIM, jergilikti atqarýshy organdar men jol qyzmetterinen 539 adam jáne 277 tehnika jumyldyryldy.
Aqmola, Qaraǵandy, Pavlodar, Qostanai oblystarynyń jylytý pýnkterinde 89 adam, onyń ishinde 11 bala bar. Avtojoldardyń jabyq ýchaskelerinde halyqty evakýatsiialaý úshin ýaqytsha jylynýǵa arnalǵan 40 pýnkt daiyndaldy. Jol qyzmetteri qardan tazartý jumystaryn júrgizýde», - dep atap ótedi ministrlikten.
TJM-nyń aqparatyna súiensek, halyqty eskertý maqsatynda aýa raiynyń nasharlaýy týraly 74 SMS-habarlama jiberildi jáne «Dármen» mobildik qosymshasy arqyly 56 habarlama joldandy.
Qazirgi ýaqytta avtojoldardyń 86 ýchaskesi jabyldy. Onyń 33-i respýblikalyq jáne 53-i oblystyq mańyzy bar. Bul rette avtokólikterdiń jinalýy Qaraǵandy (593 birlik tehnika), Aqmola (546), Qostanai (53) oblystarynyń jáne Nur-Sultan qalasynyń (60) blokpostarynda baiqalady.
Ótken táýlikte Nur-Sultan, Almaty qalalarynda, Aqmola, Almaty, Aqtóbe, Atyraý, Jambyl, Qaraǵandy, Qyzylorda, Pavlodar jáne Soltústik Qazaqstan oblystarynda daýyldy jeldiń saldarynan shatyrlardyń buzylýy men aǵashtardyń qulaýy, sondai-aq elektr energiiasynyń ishinara ajyratylýy oryn aldy. Nur-Sultan, Almaty qalalarynda jáne Almaty oblysynda tótenshe jaǵdailardyń saldarynan 6 adam, onyń ishinde 3 bala zardap shekti.
TJ ministrliginde tótenshe jaǵdaidy joiý jónindegi respýblikalyq shtab quryldy. Aqmola, Aqtóbe, Pavlodar, Qostanai, Qaraǵandy, Soltústik Qazaqstan oblystarynda osyndai shtabtar jumys júrgizýde. Psihologiialyq kómek jáne aqparattyq qoldaý kórsetý úshin respýblikalyq jáne aýmaqtyq shtabtarda jedel jeli telefony jumys jasaidy.
