Foto: instagram.com/niyazkulova_erke
Zańsyz utys oiyndaryn ótkizip, qylmystyq jolmen 162 million teńgeni iemdendi dep kúdikke ilingen ánshi Abai Begeidiń qyzy Gúlerkem Niiazqulova men onyń jubaiy jazadan sytylyp ketti. QR Qarjylyq monitoring agenttigi blogerdiń nelikten jazalanbaitynyn túsindirdi, dep habarlaidy Ult.kz Azattyq Rýhy-na silteme jasap.
Ánshiniń qyzy Gúlerkem Niiazqulovaǵa qatysty Qylmystyq kodekstiń 214-babynyń 2-bóligi, 2-tarmaǵy – "zańsyz kásipkerlikpen ainalysý" boiynsha tergeý júrgizilgen.
"Qylmystyq is Mańǵystaý oblysy boiynsha Ekonomikalyq tergeýler departamenti tarapynan Qylmystyq kodekstiń 35-baby 1-bóligi 3-tarmaǵyna sáikes, amnistiia aktisiniń negizinde toqtatyldy", – delingen agenttiktiń resmi jaýabynda.
Osylaisha, milliondaǵan teńgeni zańsyz iemdendi dep kúdikke ilingen Abai Begeidiń qyzy amnistiiaǵa iligip, qylmystyq jaýapkershilikten bosatyldy.
Aita keteiik, Gúlerkem Niiazqulova kúieýimen birge Instagram, TikTok jáne Telegram arqyly onlain lotereialar ótkizip kelgen. Olar lotereia operatory retinde tirkelmese de, avtokólik, páter jáne ózge de baǵaly syilyqtardy usynǵan. Biletter 500 teńgeden 50 000 teńgege deiin satylǵan.
Tergeý málimetinshe, zańsyz lotereialarǵa 1 800-den astam adam qatysqan. Erli-zaiyptynyń kirisi 162 mln teńgeden asqan. Qarjylyq monitoring agenttigi tekserisinen keiin olardyń jyljymaityn múlki men bank shottaryna shekteý qoiylǵan.
