22 jasynda ózinen 16 jas úlken azamattyń toqaly atanyp, on jyl boiy týǵan anasynyń túrin kórýge zar bolǵan Aigúl Júzbaevanyń oqiǵasy qalyń jurtshylyqty alańdatty. "Eýraziia" arnasyndaǵy "Kóremiz" tok-shoýynyń jýrnalisteri úsh balaly anany tapty, dep habarlaidy KAZ.NUR.KZ.
Aigúldiń anasy Shynygúl Júzbaeva osydan on jyl buryn 22 jastaǵy qyzyn toqaldyqqa beredi. Bir qyzyǵy, qalyńdyqtyń qolyn er adam emes, onyń báibishesi surap kelgen.
"Adamnyń ishinde ne bar ekenin bilmeisiń ǵoi. Aigúl Astanada jumys istep júrgeninde, bir jigitpen sóilesti. Ol almai ketti. Sodan soń, 16 jas úlken azamat surap kelgende, jaqsy bolyp keter degen oimen berdik. Ákesi de namystandy. Qyzym bolashaq kúieýin unatqan joq. Biraq aýylda sóz bar, basqa bar, sol adamǵa turmysqa shyqty. Báibishesiniń ózi keldi. "Qansha kún ómirim qalǵanyn bilmeimin, meniń kúieýime er bala syilasa eken", - dedi. Sodan beri Aigúl úsh balaly boldy. Biraq balalary týylyp, besik aparǵanymda, báibishe barlyq balany ózi iemdenip otyrdy. Odan bólek, on jyldyń ishinde qyzymmen úsh ret qana kezdestim. Sońǵy kezderi telefonmen de sóilestirmeidi. Eger qyzym telefon shalsa, báibishesi qasynda bárin tyńdap turady. Sońǵy habarlamasynda sharshaǵanyn, endi alyp ketpesek, óletinin aitty", - deidi Shynygúl ana.
Osydan soń, ol kishi qyzymen birge Kóremiz tok-shoýyna ótinim joldap, osy bir qiyn oqiǵany sheshý úshin kómek suraidy.
"Biz talai ret ózimiz telefon áperdik, ony da ustatpai, syndyryp tastady. Negizi, ózimiz Ózbekstannan kóship kelgen soń, bul jaqtyń zańyn kóp bilmedik. Talai ret alyp ketýge oqtaldyq, biraq bizdi aýlamyzdaǵy bir tasty da almaisyńdar dep, qýyp jiberdi. Men ápkemdi quldyqta júr dep senimmen aita alamyn", - deidi sińlisi Ainur Júzbaeva.
Osydan soń jýrnalister Aigúldiń kúieýi jáne onyń báibishesimen sóilesti. Telearna málimetinshe, olar ekinshi áieldi ruqsatymen alǵanyn aityp, tilshilerdi qýyp jibergen. Sondai-aq baǵdarlama júrgizýshisi Rýslan Ótepbai túsirilim kezinde kóptegen kedergi bolǵanyn da jetkizdi. Biraq tilshiler men quqyqqorǵaý organdary birlese jumys istep, Aigúl men anasyn araǵa on jyl salyp kezdestirgen.
"Men otbasymdy saqtaý úshin bárin istedim. Kúndesimnen de, kúieýimnen de taiaq jedim. Biraq balalar úshin shydadym. Qolyma telefon bergen joq, qashyp keteiin desem, pasportym joq. Tipti, on jyl boiy meni darbazanyń arǵy betine shyǵarǵan joq. Men ata-anama eshteńe aitpadym, otbasyn saqtaý úshin bárine kóndim. Men balalarymnyń muǵalimderin de kórmeimin. Eshkimdi tanymaimyn. Dárethanaǵa barý úshin de suranamyn. Eger jiberse baramyn, jibermese barmaimyn. Úidiń barlyq jumysy meniń moinymda. Ne istesem de jaqpaimyn olarǵa. Shymkent, Jetisai túgili, darbazanyń bergi betine, kóshege de shyqpaǵanmyn", - deidi Aigúl.
Osydan soń, Aigúl anasyna oraldy. Alǵashynda úsh bala báibishe men kúieýiniń qolynda qalǵan. Biraq zańdy turǵyda balalar anasyna qaitarylyp, Aigúldiń qasyna keldi. Qazirgi tańda Aigúl Júzbaevanyń ómiri tolyq ózgergen. Ol jumysqa turyp, balalaryn asyrap júr. Odan bólek, qaiyrymdy azamattar Aigúl men onyń úsh balasyna jańa úi satyp áperdi.
