15 millionnan astam qazaqstandyq mindetti meditsinalyq saqtandyrý júiesinde saqtandyryldy. Bul týraly Áleýmettik meditsinalyq saqtandyrý qory basqarma tóraǵasy Bolat Tókejanov málim etti, dep habarlaidy QazAqparat.
«Tótenshe jaǵdai kezeńinde halyqtyń bir bóligi tabysynyn aiyrylyp, osy jarnany engizý múmkindigi bolmady. Osyǵan bailanysty qor indet kezeńinde tabysynan aiyrylǵandarǵa saqtandyrý mártebesin qalpyna keltirý úshin Úkimetke birqatar usynysty engizdi. Qabyldanǵan sharalar meditsinalyq saqtandyrý júiesine 740 myńǵa jýyq adamdy qaitardy», - dedi B. Tókejanov Ortalyq kommýnikatsiialar qyzmetinde.
Onyń sózine qaraǵanda, qazirgi kezde MÁMS-te 15,3 mln adam saqtandyrylǵan. 1 qyrkúiektegi jaǵdai boiynsha meditsinalyq saqtandyrý júiesinen 3,4 mln adam tys qalyp otyr. Bul óz kezeginde halyqtyń jalpy sanynan 18 paiyz shamasynda.
«Onyń ishinde 2 millionnan astamy - biryńǵai jiyntyq tólemdi tóleýshiler, derbes tóleýshiler, jaldamaly jumysshylar, jeke kásipkerler, jeke tájiribemen ainalysatyndar. Olar júiesiz ári turaqsyz aýdarym sebebinen júieden tys qaldy. 2020 jyldyń qańtar aiynan bastap 1,3 mln adam MÁMS júiesine birde-bir ret jarna men aýdarym jasamaǵan, sondyqtan olarda meditsinalyq saqtandyrýda mártebesi joq», - dedi B. Tókejanov.
Osy oraida ol MÁMS-ten tys qalǵan adamdardy júiege qatysýǵa shaqyrdy.
«Saqtandyrylǵan azamattar úshin meditsinalyq qyzmetterdiń kólemi men qunyna qatysty shekteý joq. MÁMS-ke jylyna 25 myń teńge kóleminde eń tómengi tólem jasaǵan patsient meditsinalyq kómekti tegin alady, al aýdarǵan jarnasynyń somasy mańyzdy emes», - dedi ol.
