Terrorizmdi qarjylandyrýshy tulǵalar tiziminde 1500-ge jýyq qazaqstandyq bar, dep habarlaidy QazAqparat tilshisi.
Búgin elordada QR Ádilet ministrligi janyndaǵy zań jobalaý qyzmeti máseleleri jónindegi vedomstvoaralyq komissiianyń kezekti otyrysy ótti. Onda qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy máseleler boiynsha elimizdiń keibir zańnamalyq aktilerine ózgerister men tolyqtyrýlar talqylandy.
Osy máselege qatysty baiandama jasaǵan QR Qarjy ministrligi Qarjylyq monitoring komitetiniń tóraǵasy Anýar Jumadildaevtiń aitýynsha, búginde elimizde terrorizmdi qarjylandyrýshylar tizimine engen 1500-ge jýyq adam bar. Jalpy atalǵan tizimge sottyń sheshimi kúshine engennen keiin ǵana zańdy jáne jeke tulǵalar kirgiziledi.
«Terrorizmdi qarjylandyrýǵa qarsy is-qimyl týraly» zań boiynsha atalǵan tizimge engender shekteýge tap bolady. Olar óte kóp. Salyq tólep, áleýmettik jardámaqy alýǵa ruqsat berilgenimen, olar kommertsiialyq qyzmetpen ainalysa almaidy. Qazirgi ýaqytta birqatar túitkildi másele oryn alyp otyr. Máselen, adam jumys istep, nesie alǵannan keiin belgili bir ýaqyttan soń atalǵan tizimge qosyldy. Ol nesiesin tóleýi qajet. Biraq, zań oǵan muny jasaýǵa múmkindik bermeidi. Óitkeni, onyń esepshoty buǵattalǵan. Osy turǵydan alǵanda olarǵa ózderiniń nesielerin óteýge múmkindik bergimiz keledi», - dedi ol.
Onyń aitýynsha, mundai shekteý atalǵan tizimge engen zańdy tulǵalarǵa qatysty da qoldanylady.
«Ol jumysqa ornalasqannan keiin jumys berýshi áleýmettik tólem jasaýy qajet. Biraq, qoldanystaǵy zańnamaǵa sáikes ol muny jasai almaidy. Óitkeni, ol adam tizimde bar. Biz osy máseleni jeńildetip, adamǵa jumys jasaýǵa múmkindik bermekpiz», - dedi Ánýar Jumadildaev.
Komitet basshysynyń aitýynsha, uiym basshysy atalǵan tizimge kiretin bolsa, onda búkil zańdy tulǵalar zardap tartatyn bolady.
«Biz bul rette de qandaida bir túzetý engizýimiz qajet. Sebebi, olar biýdjetke tólem jasap, nesielerin ótei almaidy. Munyń barlyǵyn sáikestendirmekpiz», - dedi ol.
