«JOO úzdik oqytýshysy – 2020» baiqaýynyń jeńimpazdary marapattaldy, dep habarlaidy "Ult aqparat" Bilim jáne ǵylym ministrligine silteme jasap.
Elimizdiń 46 joǵary oqý ornynan 150 adam «Joǵary oqý ornynyń úzdik oqytýshysy» ataǵyna ie boldy. Olardyń árqaisysy 5 834 000 teńge (2000 AEK) kóleminde grant jeńip aldy.
Úmitkerlerdi irikteý jáne qujattardy tekserý rásimi alǵash ret aqparattyq júieniń kómegimen onlain formatta ótkizildi. Baiqaýǵa qatysýshylardyń qyzmeti oqytý sapasy men ǵylymi-zertteý jetistikteri boiynsha baǵalandy. Baiqaý nátijeleri ministrliktiń saityna ornalastyryldy.
Respýblikalyq sarapshylar toby árbir qujattyń sáikestigin muqiiat tekserdi. Sondai-aq komissiia quramyna QR BǴM «Adal Bilim» sybailas jemqorlyqqa qarsy is-qimyl jónindegi jobalyq keńsesiniń ókilderi, ǵalymdar men oqytýshylar, sonyń ishinde «Joǵary oqý ornynyń úzdik oqytýshysy» baiqaýynyń ótken jyldardaǵy jeńimpazdary kirdi.
Ministr bilim jáne ǵylym júiesi úshin mundai baiqaýlardyń ashyq túrde ótýi mańyzdy ekendigin erekshe atap ótti.
«Pandemiia kezinde elimizdiń joǵary bilim berý júiesi mańyzdy synaqtan ótip, JOO-lardyń jumysy jaqsy deńgeide uiymdastyryldy. Osy rette syn-qaterlerdi múmkindik retinde qabyldaýǵa tiispiz. Qandai da bir qiyndyqtar men qolaisyzdyqqa qaramastan, qazaqstandyq oqytýshylar bul jaǵdaiǵa tez beiimdeldi. Búgingi tańda bizdiń aldymyzda oqytýshynyń bedelin arttyrý, eńbek júktemesin azaitý, eńbekaqyny kóbeitý, oqytýshylardy ózine tán emes fýnktsiialarǵa tartýǵa jol bermeý boiynsha jáne elimizdiń Prezidenti Qasym-Jomart Toqaev aiqyndaǵan basqa da birqatar mańyzdy mindet tur», – dedi ministr Ashat Aimaǵambetov.
Konkýrsqa respýblikanyń 73 joǵary oqý ornynan 623 úmitker qatysty.
