Elorda ákimi Altai Kólginov COVID-19 boiynsha qaladaǵy jaǵdaidy baiandady, dep habarlaidy QazAqparat.
«Biylǵy jyl dárigerler úshin qiyn boldy. Dárigerlerdiń kómegimen jáne olardyń tikelei jumysymen qalamyzdyń 15 myńnan astam turǵyny COVID-19 aýrýynan jazylyp shyqty. Elbasynyń «Birgemiz» atty úndeýi men Memleket basshysynyń qadaǵalaýynyń nátijesinde COVID-19 virýsymen kúrestiń alǵashqy tolqynyn eńserip, daiyndyqty kúsheittik. Qazirgi tańda elordada 176 adam em alýda. Salystyrmaly túrde aitar bolsaq, jaz ailarynda bir kúnde 3911 adam em alyp jatqan bolatyn», - dedi ákim Ortalyq kommýnikatsiialar qyzmetinde ótken brifingte.
Ákimniń aitýynsha, qazir qaladaǵy jaǵdai turaqtandy. Biraq ári qarai da bul jumysty kúsheitilgen túrde qadaǵalap otyrý qajet.
«Jyl basynda PTR testileý boiynsha bir ǵana zerthanamyz bolsa, qazir onyń sany 17-ge deiin artty. Testileý ýaqyty boiynsha, jaz ailarynda júkteme kúsheigende 5 kúnge deiin kútýge týra keletin. Qazir zerthanalardyń qýaty artyp, test nátijesi 4 saǵatta berilip jatyr. Statsionarlarda izotermiialyq mini-zerthanalar ornattyq, olar statsionarda emdelip jatqan naýqastardyń testileý nátijesin eki saǵatta kórsete alady», - dep túsindirdi A. Kólginov.
Sonymen birge, vedomstvoaralyq komissiia sheshimimen elge keletin barlyq reis jolaýshylarynan PTR anyqtamalary talap etiledi.
«Tiisti anyqtamasy joq jolaýshylardy karantin statsionaryna jetkizemiz jáne tekserýden keiin ǵana qalaǵa kirgizemiz. 6 qazannan beri 4800 jolaýshy karantin statsionaryna bardy, onyń 28-inen COVID-19 virýsy anyqtaldy jáne emdeýge jiberildi», - deidi ákim.
