UBT-dan eń joǵarǵy 140 bal jinaǵan almatylyq boijetken Shiara Qudaibergenova qai joǵary oqý ornynda bilim alatynyn aitty, dep habarlaidy QazAqparat tilshisi.
Almatylyq túlek Súleiman Demirel ýniversiteti men L.Gýmilev atyndaǵy Eýraziia ulttyq ýniversitetiniń memlekettik basqarý mamandyǵyn tańdaǵan eken.
«Negizi 4 oqý ornyn jazý kerek bolǵan. Men úsheýine Súleiman Demirel Ýniversitetin, bireýine Eýraziia Ulttyq Ýniversitetin jazdym. SDÝ-da qarjy mamandyǵyn tańdadym. Al EUÝ-da memlekettik basqarý mamandyǵyna túskim keldi. Men negizi logist bolǵym kelgen, biraq ol mamandyq qazir elektrondy túrde damyp jatyr eken. Men SDÝ-da qarjy mamandyǵyn tańdaǵan sebebim, 4 jylda xalyqaralyq 14 sertifikattyń 9-yn alyp shyǵamyn. Bul sertifikattar basqa JOO-da berilmeidi eken. Al qarjygerlerge bul sertifikat aýadai qajet. Sol úshin qarjy mamandyǵyn tańdadym», - dedi ol.
Shiaranyń aitýynsha, ony bilim alýǵa ál-Farabi atyndaǵy Qazaq Ulttyq ýniversiteti, Súleiman Demirel Ýniversiteti, UIB, AlmaU jáne taǵy da basqa birqatar jekemenshik ýniversitetter shaqyrǵan.
«Biraq men SDÝ-dy tańdadym. Sebebi aldaǵy 4 jylda atalǵan ýniversitet meniń bilimimdi molaitady dep senemin. Munda talap joǵary. Barlyq sabaq aǵylshyn tilinde bolady. Sol úshin aǵylshyn tili kýrsyna qatysyp júrmin», - dedi almatylyq túlek.
Aita ketý kerek, respýblika boiynsha UBT testileýden eń úzdik nátije - 140 upaiǵa qol jetkizgen Qoja Ahmet Iassaýi atyndaǵy №123 mektep-gimnaziianyń túlegi Shiara Qudaibergenova Altyn belgi men úzdik attestatqa úmitker bolmaǵan.
