Búgin Ortalyq kommýnikatsiialar qyzmetinde ótken baspasóz máslihatynda QR BǴM Ulttyq testileý ortalyǵynyń direktory Ramazan Álimqulov biylǵy ulttyq biryńǵai testileýdiń qorytyndylary týraly qorytyndy málimdeme jasady, dep habarlaidy "Ult aqparat". Biyl Qazaqstanda 98 698 bitirýshi eldiń basty emtihanyn tapsyrǵan.
«Jalpy, biyl UBT 167 pýnktte ótkizildi. Sonyń ishinde kolledjder bazasynda - 3, joǵary oqý oryndary bazasynda - 48, mektepter bazasynda - 116 pýnkt boldy. Biyl UBT tapsyrýǵa 102447 ótinish berildi. Sonyń 77224-i qazaq tilinde, 25177-si orys, al 46-sy aǵylshyn tilinde tapsyrý nietin bildirgen. Fakti boiynsha 28 túlek aǵylshyn tilinde tapsyrǵan. Is júzinde biyl 98698 bitirýshi UBT tapsyrdy, byltyr bul kórsetkish 88583 bolatyn», - dedi ol.
Ramazan Álimqulovtyń aitýynsha, 9 mektep bitirýshiniń tapsyrǵan emtihan nátijeleri kúshin joiǵan. Shektik deńgeiden 84065 bitirýshi ótti, al osy mejeni baǵyndyra almaǵandar sany - 14633.
Biyl bes pán boiynsha ortasha ball 83,1-di qurady (2017 jyly bul kórsetkish 80,5 bolatyn). Eń joǵary ball da byltyrǵydan bir saty joǵarylap, 140 balǵa jetti.
"Eń joǵary 140 baldy Shiara Qudaibergenova jinady. Ol Almaty qalasyndaǵy mekteptiń túlegi. UBT-ny Qazaq ulttyq agrarlyq ýniversitetinde 25 maýsymda tapsyrdy", - dedi Álimqulov.
Sondai-aq, onyń aqparatynsha, biyl múmkindigi shekteýli 51 bala UBT tapsyrǵan.
Ortalyq direktory osy jyly UBT tynysh ótkenin atap ótti.
Ramazan Álimqulov shekti ball jinai almaǵan 14 633 túlek tamyz aiynda UBT-ny qaita tapsyra alatynyn da qosa ketti. Ol úshin olar 25 shilde men 3 tamyz aralyǵynda ekinshi ret tapsyrýǵa ótinish berýi kerek. Al UBT 15-19 tamyz aralyǵynda ótedi. Tamyz aiynda da shekti deńgeiden ótpei qalsa, onda qysta qaitadan tapsyrýǵa múmkindik bar.
