Shymkentte órtenip jatqan úiden sábilerdi aman alyp qalǵan 13 jastaǵy Baqytjan Berkimbai eki apta buryn qolyn syndyryp alǵan, dep habarlaidy QazAqparat tilshisi.
Baqytjannyń sózinshe, sol kúni ol kóshede kólikte otyrǵan. Kenetten kórshiniń Arai esimdi qyzy úilerinde órt shyqqanyn aityp, kómek surap kelgen.
«Úide anam bar edi. Biraq men oǵan aitýǵa úlgermei, dereý janyp jatqan úige bardym. Qarasam úidiń ishinde órt shyǵyp, jan-jaǵy janyp jatyr eken. Sol úidiń 6 jasar qyzy men 3 jasar balasy bir shette qorqyp otyrdy. Tútinge tunshyqqan ba, áiteýir esinen tanýǵa shaq qalǵan. Dereý kishkentaiyn qolyma kóterip aldym da, úlkenin jetektep alyp shyqtym. Syrtqa shyqqan soń sý berip, kómektesýge tyrystym. Kórshiniń úiine alyp bardym. Anam qutqarý qyzmetine habarlasty. Keiin ata-analary da keldi», - deidi jasóspirim búgin qalalyq TJD ótkizgen baspasóz máslihatynda.
Búginde segizinshi synypta oqityn bala otqa oranǵan úige kirgen kezde qorqýǵa ýaqyt bolǵan joq deidi. Óitkeni ol mektepte sondai daiyndyq sabaqtarynan ótkenin, sonyń arqasynda tezirek kómek kórsetýge umtylǵanyn aitady.
Al, Baqytjannyń synyp jetekshisi bolsa onyń úiinde tórt aǵaiyndy ekenin jetkizdi. 13 jastaǵy oqýshysy - úidiń kenjesi. Synypta júrgende de tek jaqsy qyrymen tanylǵan.
«Baqytjan - óziniń dostaryna únemi qol ushyn berip júretin zerek bala. Baisaldy, meiirimdi, sabyrly minezi bar. Tárbie saǵattaryna da qatysýy jaqsy. Onyń bul jasaǵan erligi ózge oqýshylarymyzǵa da ónege bolyp otyr. Óitkeni janyp jatqan úige kirýge bala turmaq, eresekterdiń ózi bara bermeidi, - deidi Baqytgúl Lekerova.
Búgin jas qutqarýshyny qalalyq TJD basshylyǵy arnaiy alǵys hatpen marapattaldy. Sondai-aq, departament bastyǵy Nurbolat Derbisov «Erligi úshin» medalimen marapattaý úshin elimizdiń IIM atyna jáne arnaiy alǵys hatpen marapattaý úshin qalalyq ákimdikke usynys joldanǵanyn jetkizdi.
«Baqytjan keleshekte bizge qutqarýshy bolyp keledi dep senemiz. Mundai jigitterge biz arnaiy oqý ornyna barý týraly usynys aitamyz. Biz úshin onyń der kezinde jasaǵan áreketi úlken erlik dep aitar edim. Onyń ata-anasyna jáne ustazdaryna alǵys aitamyn»,- dedi Nurbolat Derbisov.
Órtke oranǵan úidiń 7 jastaǵy qyzynyń aitýynsha, alty jastaǵy sińlisi men 3 jastaǵy inisi ottyqpen oinap otyrǵanda kórpe jana bastaǵan. Balalar ony ózderi óshirmek bolypty, biraq órt ulǵaiyp ketken.
Aita keteiik, 16 aqpan kúni qaladaǵy Qursai móltek aýdanynda jeke úiden órt shyqqan bolatyn. Onda qaraýsyz 3 bala qalǵan. Janyp jatqan úide qalǵan eki balany sol mańda turatyn 13 jastaǵy Baqytjan Berkimbai alyp shyqqan edi. Jasóspirim der kezinde qutqaryp qalǵanynyń arqasynda eki búldirshin aman qaldy.
