"Jeksenbi, iaǵni 14 tamyz kúni qazaqstandyqtar ádettegidei Rio-de-Janeirodaǵy Olimpiada oiyndarynda el myqtylarynyń birneshe sport túrinen ótkizetin saiystaryn tamashalai alady", - dep habarlaidy Ult.kz tilishisi.
Tartysty básekeler shymyldyǵy Astana ýaqytymen 03:30-da 69 kelige deiingi salmaq dárejesinde óner kórsetetin qazaqstandyq boksshy Daniiar Eleýsinov pen venesýelalyq sportshy Gabriel Maestre arasyndaǵy jekpe-jekpen ashylady. 30 jastaǵy Maestre - bokstan Venesýela quramasynyń kapitany. 2015 jyly Panamerikalyq oiyndardyń chempiony atanǵan, 2013 jyly áýesqoilar arasynda ótken álem chempionatynda qola ilgen bylǵary qolǵap sheberi. Al bizdiń 25 jastaǵy bahadúrimiz 2013 jyly álem chempiony ataǵyn jeńip alǵan. Sonymen qatar, 2010 jyly jáne 2014 jyly Aziia oiyndarynyń jeńimpazy atanǵan halyqaralyq sanattaǵy sport sheberi. Daniiar - Batys Qazaqstan oblysynyń týmasy. Qazirgi ýaqytta Astanada ákesi Marat Eleýsinovtiń qol astynda jattyǵady. 1/8 finalda Daniiar britandyq boksshy Djoshýa Kelliden basym túsken edi.
Ýaqyt tili 03.45-kelgende 91 kelige deiingi salmaqta bokstasatyn qazaqstandyq Vasilii Levit kýbalyq boksshy Erislandi Savonǵa qarsy judyryqtasatyn bolady. Eki dúrkin Qazaqstan chempiony, Aziia birinshiliginiń jeńimpazy Vasilii Levit 1/8 finalda qytailyq Iýi Fenkaidy, al ¼ finalda mavrikiialyq Kennedi Sen-Perrdi tize búktirgen. Degenmen, kelesi qarsylas - ońai shaǵylar jańǵaq emes. 26 jastaǵy E.Savon - 2015 jylǵy álem chempionatynyń kúmis júlde iegeri, 2008 jylǵy jastar arasyndaǵy álem chempionatynyń jeńimpazy, Panamerikalyq oiyndardyń chempiony, ulttyq birinshilikterdiń birneshe dúrkin chempiony.
Tańǵa jaqyn, saǵat 04:45-te asa aýyr salmaqta 2012 jylǵy Olimpiada oiyndarynyń qola júldegeri, qazaqstandyq boksshy Ivan Dychko sharshy alańǵa shyǵady. Onyń qarsylasy ázerbaijandyq Mogamedrasýl Medjidov. Medjidov - eki dúrkin álem chempiony (2011, 2013).
2013 jyly aqtyq synda ol Ivan Dychkony nokaýtqa jiberip, altyn medaldi jeńip alǵan bolatyn. Dychko úshin bul jekpe-jek ardyń isi bolmaq.
Keshke saǵat 18.00-de qazaqstandyq sportshy Iýrii Iýrkov nysana kózdeýden synǵa túsedi. Ol vintovkamen atýdan 50 metrlik qashyqtyqta nysana kózdeý boiynsha synǵa túsedi.
19.00-de grek-rim kúresinen erler arasyndaǵy 59 keli salmaq dárejesinde kúresetin Almat Kebispaev pen 75 keli salmaq dárejesinde baq synaityn Dosjan Qartyqov boz kilemge shyqpaq.
Saǵat 20:00-de qazaqstandyqtardy taǵy bir qyzyq jarystardyń biri kútip tur. Apaly-sińili Aleksandra men Ekaterina Nemichter ádemi sporttardyń biri - sinhrondy júzýden baqtaryn synaidy. 2016 jyly naýryzda Braziliiada ótken litsenziialyq jarysta olar Olimpiada Oiyndaryna joldama utyp alǵan bolatyn. 21 jastaǵy qos qyzymyz Qazaqstan chempiondary jáne 2014 jylǵy Aziia oiyndarynyń eki dúrkin qola medal iegerleri. Toǵyz jastan beri osy sportta júrgen sportshy qyzdardy Janna Demchenko jattyqtyrady.
Qazaqstandyqtardyń ishinde keshki olimpiadalyq jarystardy áielder boksy támamdaidy. Saǵat 20:15-te qazaqstandyq boksshy Dariǵa Shákimova kanadalyq sportshy Arian Fortirmen kúsh synasady. 28 jastaǵy Dariǵa 75 kelige deiingi salmaqta judyryqtasady. 2010 jyly Aziia chempionatynda chempion atanǵan qyzymyz Qazaqstan birinshiliginiń jeńimpazy.
