Belgili aitysker aqyn Balǵynbek Imash qazaqtyń ulttyq "Dál basý" oiynyna qatysty, - dep habarlaidy "Ult aqparat".
Bul týraly aitysker Instagram jelisindegi paraqshasynda jazdy.
"(...) Mynaý "Dál basý" degen ulttyq oiyn. Moinyńa salmaǵy 100 keliden asatyn qoshqardy salyp alyp, uzyn bóreneniń ústinen júrip ótý kerek. Qoshqardyń salmaǵymen teppe-teńdikti saqtai otyryp, endi júre bastasań, ol yshqynyp qozǵalady, sekirmek bolady, iaǵni, tepe-teńdikti saqtap márege jetý - jigittiń jigitine ǵana buiyrady (maǵan buiyrmady). (...) Almaty irgesindegi Qaskeleń shaharynda qazaqtyń aqyldy arý qyzy muryndyq bolyp ótkizgen Naýryz toiyna baryp, shaǵyn aqyndar aitysyn jasap berdik. Kezek ulttyq oiyndarǵa kelgende kórermen bolyp tura bermeiin dep belbýyp belsene aralasyp kettim. Ózim serpilip, jurtym jelpinip qaldy. Bes uldyń ákesi bolǵandyqtan uldarymnyń naǵyz er minezdi, balýan bilekti, batyr júrekti bolýyn qalaimyn. Endi olarǵa ózim úlgi bolmasam, kimge qarap boi túzeidi?", - dep jazǵan aqyn.
Sondai-aq, aitysker jazbasynyń sońynda 110 keli aq qoshqardy arqalap bórenemen júrgennen jáne 120 keli qoshqardy moiynǵa salyp kóterýden jarysqannan aiaq-qolynyń aýyryp, áreń qozǵalyp júrgenin aitady.
Aita keteiik, Balǵynbek Imashev Qazaqstanǵa belgili aitysker. Ol 1977 jyly Almaty oblysy Kerbulaq aýdany Jolaman aýylynda dúniege kelgen. Birneshe halyqaralyq jáne respýblikalyq saiystardyń jeńimpazy.
