Oqý-aǵartý ministri Ashat Aimaǵambetov Pavlodar oblysynyń bilim berý nysandaryn aralap, aýyl muǵalimderimen kezdesti, dep habarlaidy "Ult aqparat".
«Jetekshi aýylynyń mektebinde muǵalimdermen áńgimelesip, oqý baǵdarlamalary men jazǵy mekteptiń qorytyndysyn talqyladyq. Sondai-aq jalaqy taqyryby da nazardan tys qalmady. Mysaly, 12 jyldyq tájiribesi bar informatika pániniń muǵalimi jalaqysy 400 myń teńgege jýyq ekenin jáne bul aýyl mektebi úshin jaqsy tabys ekenin aitty.
Jalpy mekteptiń jaǵdaiy qanaǵattanarlyq, sabaq ótkizýge jaqsy jaǵdai jasalǵanymen, «Oqýǵa qushtar mektep» jobasy tiisti deńgeide oryndalmaǵan, satyp alynǵan ádebietter ministrliktiń usynystaryna sai kelmeidi jáne balalarǵa qyzyqty basylymdar az. Bul baǵytta tiisti jumystar júrgizilýi qajet», - dep jazdy ol jelidegi paraqshasynda.
Sonymen qatar ministr aqparattyq tehnologiialar kolledjinde boldy.
«Kolledjdiń buryn qandai bolǵanyn jáne qazir qandai jaǵdaiǵa jetkenin eskersek, atqarylǵan jumystar tań qaldyrady. Óńir basshysynyń TjKB-ny jáne onyń ishinde osy kolledjdi damytý máselesine atsalysyp jatqany qýantady.
Byltyr osy kolledjdiń stýdenti elimizge EuroSkills saiysynan medal alyp kelgen bolatyn. Ol «Veb-dizain» baǵyty boiynsha saiysqa tústi.
Kemeńger aýylyndaǵy taǵy bir kolledj veterinar daiyndyǵy baǵyty boiynsha jumys isteidi. «Jas maman» jobasynyń arqasynda kolledjdiń materialdyq-tehnikalyq bazasy jaqsartylǵan. Kolledjdiń jumysqa ornalastyrý, oqý sharýashylyǵyn damytý jáne dýaldy oqytý boiynsha jaqsy kórsetkishterin atap ótýge bolady.
Bilim berý uiymdaryn aralaǵannan keiin barlyq basshyǵa tiisti tapsyrmalar berildi», - dep tolyqtyrdy Aimaǵambetov.
