Oral qalasyndaǵy «Atameken» óner ordasynda jyldyń úzdik sportshylary marapattaldy, dep habarlaidy QazAqparat.
Biyl 11 jasynda batýttyq gimnastikadan Bakýde ótken álem chempionatynda jeńimpaz atanǵan Islam Qabdollov «Jyl serpilisi» atalymymen marapattaldy.
BQO dene shynyqtyrý jáne sport basqarmasynyń basshysy Qaimen Esendiiarovtyń aitýynsha, biylǵy jyl óńir sportshylary úshin jemisti boldy.
Sonyń ishinde jýyrda, Táýelsizdik kúni 12-ge tolǵan Islam jasóspirimder arasynda óńirde alǵash ret sporttyq akrobatikadan álem chempiony atandy.
«Islam Qabdollov bolashaǵynan úlken úmit kúttiredi. Biz osyndai jas jetkinshekterimizdi qoldaýymyz kerek. Islam bapkeri Albert Tilepqalievpen birge áli talai jeńiske qol jetkizedi dep oilaimyn», dedi Esendiiarov.
Sondai-aq dziýdoshy Karina Takieva «Úmit artar sportshy», Oral qalasynyń dene shynyqtyrý jáne sport bólimi «Buqaralyq sportty damytýǵa qosqan úlesi úshin», voleiboldan «Gratsiia-KZ» klýby «Úzdik komanda», Qasym Qajenov «Úzdik bapker», №2 balalar-jasóspirimder sport mektebi «Úzdik sporttyq uiym», parataekvondodan álem chempiony Málik Muqashev «Paralimpiadalyq sport túrlerinen úzdik sportshy» atandy.
Sol sekildi toǵyzqumalaqtan Aziia chempiony Jarashan Saǵynbaev «Ulttyq sport túrlerinen úzdik sportshy», greppling sheberi Zaireden Muhambetjanov «Olimpiadalyq emes sport túrlerinen úzdik sportshy», short-trekten 2021 jylǵy álem kýbogy kezeńiniń kúmis júldegeri Ádil Ǵaliahmetov «Qysqy sport túrlerinen úzdik sportshy», bokstan Aziia chempionatynyń kúmis júldegeri Daniial Sábit «Jazǵy olimpiadalyq sport túrlerinen úzdik sportshy» atalymy boiynsha úzdik shyqty.
Qorytyndy is-shara barysynda sport salasynyń qyzmetkerleri Qazaqstan Respýblikasynyń Mádeniet jáne sport ministrliginiń vedomstvolyq nagradasymen, Batys Qazaqstan oblysy ákimdigi, Qazaqstan Respýblikasynyń Mádeniet jáne sport ministrligi Sport jáne dene shynyqtyrý isteri komiteti jáne BQO dene shynyqtyrý jáne sport basqarmasynyń alǵyshattarymen marapattaldy.
Basqarmadan túsken málimetke qaraǵanda, qazirgi kezde oblysta dene shynyqtyrý men sportpen júieli shuǵyldanýshylar sany 232 680 adamǵa jetti. Bul – óńir halqynyń 35 paiyzy.
2021 jyly oblys sportshylary túrli dodalarda 1071 medal jeńip aldy. Sonyń ishinde álem chempionatynda 14 altyn, 7 kúmis, 6 qola, Aziia birinshiliginde 8 altyn, 8 kúmis, 3 qola júldege ie boldy.
