Qazaqstanǵa 12 eldiń azamattaryn vizasyz kirgizý týraly Úkimet qaýlysy búginnen bastap kúshine endi, dep habarlaidy "Ult aqparat".
«Búginnen bastap, Qazaqstan Respýblikasyna vizasyz kirý rejimi bar elderdiń tizimin keńeitý týraly QR Úkimetiniń qaýlysy kúshine endi. Atap aitqanda, 45 memlekettiń tizimine qosymsha 12 el engizildi. Olar: Vetnam, Indoneziia, Filippin, Tailand, Bahrein, Oman, Kýveit, Saýd Arabiiasy, Kolýmbiia, Lihtenshtein, Vatikan jáne Katar. Qaýlymen atalǵan elderdiń azamattary úshin eger olardyń QR-da bolý kezeńi Qazaqstannyń memlekettik shekarasynan ótken sátten bastap 30 kúntizbelik kúnnen aspaityn bolsa, vizasyz kirý jáne shyǵý quqyǵyn berý kózdelgen», - dedi QR SIM resmi ókili Aibek Smadiiarov tilshilerge arnalǵan brifing barysynda.
Onyń aitýynsha, vizalyq formaldylyqty joiý, sheteldik investorlardyń, biznesmender men týristerdiń sanyn arttyrýǵa baǵyttalǵan vizalyq rejimdi jeńildetý Qazaqstannyń investitsiialyq ahýalyn jaqsartýǵa yqpal etedi.
«2005-2018 jyldar aralyǵynda Qazaqstanǵa atalǵan elderden 876,3 mln AQSh dollary kóleminde tikelei investitsiia tartylǵan. Qazaqstan men joǵaryda kórsetilgen memleketter ózekti halyqaralyq probelamardy retteý jónindegi óz is-qimyldaryn tyǵyz úilestire otyryp, kópjaqty jáne ekijaqty formattarda tiimdi is-qimyl jasaýda», - dedi ol.
Eske sala ketsek, Qazaqstanǵa vizasyz rejimde kire alatyn memleketterdiń tizimi 12 elmen tolyǵatyny týraly buǵan deiin habarlanǵan bolatyn.
