Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev jeke málimetterdiń jelige taralyp ketýine qatysty túsinikteme berdi, dep habarlaidy Sputnik Qazaqstan.
"Qazirgi kezde quqyq qorǵaý organdary osy máselemen ainalysyp jatyr. Olar bárin egjei-tegjeili qaraidy. Osy jumystyń qorytyndysy boiynsha barlyq málimet buqaralyq aqparat quraldary arqyly taratylady. Budan bólek, búginde biz ministrlikte aqparattyq qaýipsizdik komiteti negizinde jeke málimettermen ainalysatyn komitetti qurýdy kózdeimiz. Bul qurylym jeke málimetterdi qorǵaityn bolady. Sonyń arqasynda jańaǵy jaǵdailardy barynsha azaitýǵa bolady", - dedi Jumaǵaliev jýrnalisterge bergen suhbatynda.
Aita keteiik, kiber shabýyldardy taldaý jáne zertteý ortalyǵynyń mamandary (KShTZO) internetke 11 million qazaqstandyqtyń jeke derekteri shyǵyp ketkenin anyqtady. Kiberqaýipsizdik salasynyń mamandary ashyq jelide jariialanǵan jeke málimetterdi ótken aptada baiqap, ol jaiynda Telegram arnasynda habarlady.
"Ótken aptada KShTZO mamandary jelide iri kólemde jeke málimetterdiń shyǵyp ketkenin anyqtady. 11 million adamnyń, iaǵni eldegi kámelet jasyna tolǵan halyqtyń barlyǵynyń tolyq aqparaty saqtalǵan baza jalpyǵa qoljetimdi internet jelisinde tur. Kez kelgen adam júiege erkin kirip, ony tolyǵymen ózine júktep ala alady", - dep jazylǵan habarlamada.
Sarapshylardyń aitýynsha, bazadaǵy derekter – jańa, olar jarty jyl buryn ǵana ózektendirilgen. Ony qylmyskerler – alaiaqtar paidalanyp ketýi múmkin. Aqparat internet qoldanýshylaryna qansha ýaqyt qoljetimdi bolyp turatyny ázirge belgisiz.
"Derekter qalai jariialanyp ketkeni anyqtalyp jatyr", - dep jazylǵan ortalyqtyń habarlamasynda. Sondai-aq kiber shabýyldardy saraptaý jáne zertteý ortalyǵynyń mamandary mán-jaidy bilý úshin quzyrly organdarǵa shaǵymdandy.
