Almatynyń bas sanitarlyq dárigeri tótenshe jaǵdai rejimi aiaqtalǵannan keiin de karantin talaptaryn saqtaýǵa shaqyrady, dep habarlaidy "Ult aqparat".
Almaty qalasynyń memlekettik bas sanitarlyq dárigeri Jandarbek Bekshinniń aitýynsha, 11 mamyrdan keiin shaharda karantin rejimi saqtalady. Osy oraida, almatylyqtar meditsinalyq betperde kiip, jeke basynyń qaýipsizdigi men indettiń aldyn alý úshin dezinfektsiialyq jáne antiseptikalyq quraldardy paidalanýdy toqtatpaýy kerek.
«Barlyq qaýipsizdik sharalary saqtalatynyn aitqym keledi. Tótenshe jaǵdai rejimi aiaqtalǵan kúnniń ózinde shekteý sharalary, sanitarlyq-epidemiologiialyq talaptar saqtalady. Meniń oiymsha, bul – bizge áli de qajet. Óitkeni, koronavirýs infektsiiasyn juqtyrý qaýpi tolyq seiilgen joq», – dedi J.Bekshin.
Bul rette, qala turǵyndaryna halyq kóp shoǵyrlanatyn jerlerge barmaýǵa keńes berildi. Dúken, shashtaraz, kiim tazalaityn mekemelerge barǵanda áleýmettik qashyqtyqty saqtaý qajet. Sondai-aq, qyzmetkerlerden qarapaiym gigiena erejelerin saqtaý talap etiledi. J. Bekshin adamdar aldyn ala jazylý tártibin saqtap, úlken kezek qalyptastyrmaýǵa shaqyrdy.
«Barlyq dúken men kásiporyn sanitarlyq-epidemiologiialyq normalardy saqtaýy tiis. Bul rette, qaladaǵy barlyq jumys berýshilerge aitarym: óz qyzmetkerlerin kásiporynnyń nemese nysannyń menshik nysanyna qaramastan jeke qorǵaý quraldarymen qamtamasyz etý kerek. Barlyq personal betperde, qolǵap jáne óziniń tehnologiialyq kiiminde bolýy tiis. Dúkender men shashtaraz qyzmetkerleri mindetti túrde betperde, bas kiim jáne firmalyq kiimmen qosa, qolǵap kiiýi qajet. Barlyq úi-jailar únemi jeldetilip, al jumys oryndary dezinfektsiialaý quraldarymen óńdelýi shart», – dep atap ótti bas sanitarlyq dáriger.
Ol sondai-aq, bul erejeler qurylys nysandaryna da qatysty ekenin atap ótti. Qurylysta barlyq jumysshylar ózderiniń tehnologiialyq kiimderin kiip júrgenine qaramastan, betperde kiiýleri mindetti.
11 mamyrdan keiin qalanyń perimetri boiynsha ornalasqan blokpostar jumysy da jalǵasady. Buǵan deiin qabyldanǵan qalaǵa kirý men shyǵý erejeleri sol kúii saqtalady. Jumysqa ruqsat alǵan kásiporyndar ǵana jiberiledi. Qoǵamdyq kóliktiń jumys tártibi de ózgerissiz qalady (saǵat 06.00-den keshki 19.00-ge deiin).
