Elordada QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń keńeitilgen májilisi ótip jatyr, dep habarlaidy QazAqparat.
«Ózderińiz biletindei, QR Tuńǵysh Prezidenti – Elbasy Nursultan Nazarbaevtyń bastamasymen qolǵa alynǵan «Rýhani jańǵyrý» baǵdarlamasy aiasynda «Jańa gýmanitarlyq bilim. Qazaq tilindegi 100 jańa oqýlyq jobasy» iske asyryldy. Atalǵan jobanyń arqasynda qazaqstandyq gýmanitarlyq bilim salasy tolyqtai jańaryp, jańa deńgeige kóterildi. Dúnijúziniń aldyńǵy qatarly oqý oryndarynyń eń bedeldi ǵalymdary daiyndaǵan oqý quraldary qazaq tiline aýdarylyp, elimizdiń barlyq oqý oryndaryna jetti. Álemniń eń ozyq ýniversitetteriniń oqý mazmuny jarty millionnan asa qazaqstandyq stýdenttiń qolyna tidi. Ýniversitetterimizdiń oqý baǵdarlamalaryna kirdi. Bul turǵydan «Rýhani jańǵyrý» baǵdarlamasy men «100 jańa oqýlyq» jobasy «Bolashaq» baǵdarlamasynyń jalǵasy ispettes. Sonymen birge bul bastama qazaq tiliniń jańa qoǵamyna sai jańa bilimmen 21 ǵasyr azamattaryn qajetti aqparatpen tolyqtyrdy. Tilimizdiń ǵylymi áleýeti artty», - dedi keńeitilgen májilisti ashqan QR Memlekettik hatshysy Qyrymbek Kósherbaev.
Sondai-aq onyń aitýynsha, «100 jańa oqýlyq» jobasynyń arqasynda kásibi, akademiialyq jáne kórkem aýdarmashylar ortasy qalyptasty. Ózindik jumys tehnologiiasy, stili, terminologiiasy bar aýdarma mektebi paida boldy. Jobaǵa qatysqan júzdegen maman kásibi shyńdalyp, aýdarmashy ǵana emes ustaz, ǵalym, ziialy orta ókili retinde jańa qyrynan tanyldy.
«Osynyń barlyǵy biz el retinde qysqa ǵana ýaqytta qol jetkizgen, biraq, bizdiń rýhaniiatymyzǵa kóp jyl jemisin beretin naqty jumystyń aýyz toltyryp aitarlyq nátijesi deýge ábden bolady», - dedi Memlekettik hatshy.
