«100 jańa esim» jobasyn júzege asyrý jáne kandidattaryn irikteý jónindegi jumys tobynyń quramyna kiretin «Bolashaq» qaýymdastyǵynyń atqarýshy direktory Azamat Bojakov óziniń aldaǵy tańdaýy týraly pikir bildirdi.
Qazirgi tańda ol «100 jańa esimniń» bolýy múmkin kandidatynyń tek bireýin ǵana atady. «Bul - elimizdiń belgili bir salasynyń damýyna óziniń naqty úlesin qosqan adamdar. Eger ol dáriger bolsa, onda men kardiohirýrg Dmitrii Gorbýnovtyń esimin atar edim. Ol «Bolashaq» baǵdarlamasynyń túlegi, júrekke ota jasap, kóptegen adamdardyń ómirin saqtap qalǵan jan. Biraq ol týraly ázirge tek ózi jumys isteitin aýrýhana ǵana biledi», - dedi Bojakov.
Bojakovtyń pikirinshe, júz qazaqstandyq tulǵanyń tizimine kiretin birneshe laiyqty kandidat bar. Biraq ol olardyń esimderin atamady. «Bolashaq» baǵdarlamasy boiynsha jumys isteitin ustaz bar. Onyń balalary olimpiadalarda birneshe ret júldeli oryndar aldy. Kóptegen ǵylymi maqalalardy, sonyń ishinde balamaly energetika salasynda ǵylymi maqalalar jazǵan ǵalym da bar. Mundai adamdardyń kópshilikke tanymal media-tulǵalar bolmaýy kerektigin atap ótkim keledi. Biz elimizge jańa esimderdi kórsetkimiz keledi», - dep túsindirdi ol.
Sondai-aq, A. Bojakov atalmysh jobanyń Qazaqstannyń bolashaǵy úshin mańyzy zor ekendigin atap ótti. «Bul joba arqyly biz óziniń kún saiynǵy eńbegimen izgi ister atqaryp jatqan biregei tulǵalardy kórsetkimiz keledi. Jas urpaq úshin bul jaqsy úlgi jáne motivatsiia bolýy kerek. Sebebi jastar olardan úlgi alyp, ózin-ózi kemeldendirýge umtylady», - dedi «Bolashaq» qaýymdastyǵynyń basshysy.
