OKQ-da ótken brifing kezinde «Ulttyq aýdarma biýrosy» QQ atqarýshy direktory Raýan Kenjehanuly «Jańa gýmanitarlyq bilim: qazaq tilindegi 100 oqýlyq» jobasy aiasynda aýdarylǵan oqýlyqtardyń baǵyty jáne ataýyna toqtala ketti, dep habarlaidy Baq.kz portaly.
«Rýhani jańǵyrý» baǵdarlamasy qolǵa alynǵan kezde qamtylatyn baǵyty aitylǵan bolatyn. Ol filosofiia, áleýmettaný, tarih, mádeniettaný, til bilimi, jýrnalistika jáne ekonomika. Atalǵan baǵyttyń barlyǵy qamtyldy. Jalpy oqýlyq iriktegende eldegi JOO-lardyń talap-tilekterin eskerýge tyrystyq. Sol sebepti barlyq JOO ózderine qajetti oqýlyqtarǵa usynys berdi. Nátijesinde 800-den asa oqýlyqqa usynys keldi, - dep aitty ol.
Raýan Kenjehanuly aitýynsha, ulttyq komissiia janyndaǵy arnaiy jumys toby oqýlyqtardy qarap, saraptap, aýdarylýy tiis oqýlyqtardyń kriteriilerin shyǵardy. Iaǵni talaptardyń negizinde oqýlyqtar iriktelip otyrdy.
Árine 100 oqýlyqty bir jylda aýdarý múmkin emes. Sondyqtan kezeń-kezeńimen alǵashqy jyly 17 oqýlyq, keiin 30 oqýlyq, odan keiingi jyly taǵy 30 oqýlyq jáne sońǵy jyly qalǵan 23 oqýlyq aýdarylyp, joba máresine jetti. Biz aldymen dúniejúzindegi aýdarma uiymdarynyń jumys tásilin, tehnologiiasyn zerttep kórdik. Keiin oqýlyq shyǵaratyn aldyńǵy qatarly ýniversitetterdiń janyndaǵy baspa úilerimen jáne halyqaralyq baspa uiymdarymen bailanys ornattyq, - dedi Ulttyq aýdarma biýrosynyń atqarýshy direktory.
Ol bul jobaǵa qandai mamandar, aýdarmashylar atsalysqany týraly sóz qozǵady.
Qazaqstandaǵy barlyq JOO ustazdaryna, basshylyqtaryna, ǵylymi ortalyqtarǵa usynys aittyq. Odan bólek, jekelegen mamandarmen aqyldasyp, jobanyń redaktsiialyq alqasy quryldy. Keiin ár kitapqa jaýapty ǵylymi redaktorlar, ádebi redaktorlar tańdaldy, - dep túsindirdi Raýan Kenjehanuly.
Onyń sózinshe, jobaǵa 300-den asa maman qatysqan. Olardyń qatarynda qazaqstandyq belgili ǵalymdar, kópke tanymal qalamgerler, qazaq tiliniń mamandary, baspagerler bar.
