Elbasynyń «Rýhani jańǵyrý» baǵdarlamasy aiasyndaǵy «Jańa gýmanitarlyq bilim. Qazaq tilindegi 100 jańa oqýlyq» jobasy boiynsha qazaq tiline 18 kitap aýdaryldy, dep habarlaidy QazAqparat.
«Búgingi kúni alǵashqy 18 kitap aýdarylyp boldy. Qazir 12 sáýir kúni bolatyn tusaýkeserge daiyndalyp jatyrmyz. Olardy Elbasyna tanystyramyz», - dedi Ulttyq aýdarma biýrosynyń atqarýshy direktory Raýan Kenjehanuly.
Kitap.kz saityndaǵy derekterge sáikes, bir jylda kelesidei kitaptar aýdarylǵan: Derek Djonstonnyń «Filosofiianyń qysqasha tarihy. Sokrattan Derridaǵa deiin»; Entoni Kennidiń «Batys filosofiiasynyń jańa tarihy. Antika filosofiiasy» I-tomy jáne «Batys filosofiiasynyń jańa tarihy. Orta ǵasyr filosofiiasy» II-tomy; Remi Hesstiń «Filosofiianyń tańdaýly 25 kitaby»; Devid Brinkerhof, Roýz Ýeits, Siýzan Orteganyń «Áleýmettaný negizderi»; Djordj Rittser, Djeffri Stepnitskidiń «Áleýmettaný teoriiasy»; Elliot Aronsonnyń «Kópke umtylǵan jalǵyz. Áleýmettik psihologiiaǵa kirispe»; Dýein Shýlts, Sidnei Ellen Shýltstiń «Qazirgi psihologiia tarihy»; Devid G. Maiers, Jan M. Týenjdiń «Áleýmettik psihologiia»; N. Gregori Menkiý, Mark P. Teilordyń «Ekonomiks»; Donald F. Kýratkonyń «Kásipkerlik: teoriia, protsess, praktika»; Rikki Ý. Griffinniń «Menedjment»; Karen Armstrongtyń «Iýdaizm, hristiandyq pen islamdaǵy 4000 jyldyq izdenis: Qudaitaný baiany»; Viktoriia Fromkin, Robert Rodman, Nina Haiamstyń «Til bilimine kirispe»; Svetlana Ter-Minasovanyń «Til jáne mádenietaralyq kommýnikatsiia»; Alan Barnardtyń «Antropologiia tarihy men teoriiasy»; Klaýs Shvabtyń «Tórtinshi indýstriialyq revoliýtsiia».
Oqýlyqtardy qazaq tiline aýdarý jumysyna Qazaqstannyń aldyńǵy qatarly oqý oryndary men 100-den asa maman qatysty. Aýdarmashylar qatarynda ǵalymdar, aýdarma isiniń kásibi mamandary bar. 2018 oqý jylynan bastap bul oqýlyqtar joǵary bilim berý júiesine engiziletini josparlanýda.
Aita keteiik, QR Prezidenti Nursultan Nazarbaev «Bolashaqqa baǵdar: rýhani jańǵyrý» atty maqalasynda álemniń úzdik 100 oqýlyǵynyń qazaq tilinde shyǵýy 5-6 jyldan keiin-aq jemisin bere bastaityndyǵyn, sol sebepti, ýaqyt uttyrmai, eń zamanaýi, tańdaýly úlgilerdi alyp, olardyń qazaq tilindegi aýdarmasyn jasaýymyz kerektigin atap ótken bolatyn. Osy mindetti iske asyrýǵa múmkindik beretin negizgi tetik retinde «Jańa gýmanitarlyq bilim. Qazaq tilindegi 100 jańa oqýlyq» jobasy qolǵa alynǵan edi.
Sonymen qatar qazaq tiline aýdarylǵan alǵashqy oqýlyqtardyń tanystyrylymy 12 sáýir kúni Memleket basshysynyń qatysýymen Astanada ótedi dep josparlanǵan.
