Foto: flipboard.com
Chendýda (Qytai) ótip jatqan jazǵy Ýniversiada oiyndarynda sport jankúierleri kútpegen antirekord tirkeldi. 100 metrge júgirýden áielder arasyndaǵy básekede somalilik sportshynyń nátijesi kópshilikti tańǵaldyrdy, dep habarlaidy Massaget.kz portaly.
Jarysqa qatysqan Nasyr Áli Abýkar máre syzyǵyna bárinen kesh keldi. Ol 100 metrdi 21,81 sekýndta júgirip ótti. Jarys jeńimpazynan 10 sekýndqa qalyp qoiǵan.
Fox Sports aqparaty boiynsha, bul Ýniversiada tarihynda bolmaǵan nátije. Salystyra qaraityn bolsaq, áielder arasyndaǵy álem rekordy 10,49 sekýndty quraidy, al stýdentter arasyndaǵy úzdik nátije – 11 sekýnd.
Jarystyń videosy internette jyldam tarady. Odan 20 jastaǵy somalilik qatysýshynyń júgirý sportynan habary az, fizikalyq daiyndyǵy joq ekenin anyq baiqaýǵa bolady. Tipti, jarys aldynda qalai daiyndalý keregin de qarsylastaryna qarap baǵdarlaidy. Al kópshilik onyń osyndai iri halyqaralyq jarysqa qatysý quqyǵyna ie bolǵanyna ań-tań.
Atalǵan oqiǵadan keiin Somalidiń sport ministri Barre Mohamýd kópshilik aldynda keshirim surady. Sondai-aq eldiń jeńil atletika federatsiiasy basshysyn qyzmetinen bosatqanyn habarlady. Kei basylymdar jarysqa qatysqan Nasyr Áli Abýkardy Somalidegi belgili sheneýniktiń jieni ekenin jazýda.
Somalidegi ýniversitetter odaǵy Qytaidaǵy Ýniversiada oiyndaryna arnaiy sportshy jibermegenin habarlaǵan. Sport ministri de buǵan qatysy joqtaryn málimdegen. Ony Mogadishodaǵy ýniversitetterdiń biri qatystyrǵan, - dep jazady Somali Times.
Qazirgi tańda Somalide sportshyǵa qatysty derekter boiynsha tergeý isteri bastalǵan.
