Biyl 10 maýsymda kún saqina tárizdi tutylady. Qazaqstandyqtar sirek kezdesetin qubylysty tústen keiin tamashalai alady, dep habarlaidy "Ult aqparat".
V.G.Fesenkov atyndaǵy astrofizikalyq institýtynyń juldyzdar jáne tumandyqtar fizikasy zerthanasynyń meńgerýshisi, fizika-matematika ǵylymdarynyń kandidaty Liýbov Shestakovanyń aitýynsha, 2021 jyly kúnniń tórt tutylýy bolady. Olardyń tek bireýi ǵana kórinedi.
«Kúnniń tutylýyn erteń baiqaýǵa bolady. Bul qubylys saqina tárizdi bolady. Bul - óte sirek kezdesetin jáne tańǵajaiyp oqiǵa. Kún tutylý beldeýi Soltústik Amerika, Soltústik muzdy muhit, Reseidiń soltústik-shyǵys bóligi arqyly ótedi. Qazaqstan aýmaǵynda tutylýdyń tek jekelegen fazalary ǵana kórinýi múmkin. Iaǵni, eldiń soltústik-shyǵys oblystarynda Pavlodar, Petropavl, Óskemen, Semei qalalarynda anyq baiqalady», - dedi ol.
Nur-Sultanda kúnniń tutylýy saǵat 17.15-te bastalyp 19.03-te aiaqtalady. Bul qubylys shamamen saǵat 18:11 kezinde anyq kórinedi.
Almatyda kúnniń tutylýyn 17:44-ten bastap, 19:05-ke deiin tamashalaýǵa bolady. Ásirese 18:26 shamasynda bul qubylys anyǵyraq baiqalady.
Biyl 4 jeltoqsanda kún taǵy tutylýy múmkin. Biraq ony tek Antarktida men onyń ainalasynan ǵana kórýge bolady.
