Túrkistan qalasyn damytý maqsatynda biylǵy memlekettik jylǵy biýdjetten 161 nysannyń qurylysyna 124,2 mlrd teńge baǵyttalǵan.
Túrkistan oblysynyń ákimi Ómirzaq Shókeevtiń aitýynsha, qurylys alańyna ainalǵan kóne shahardyń ákimshilik-iskerlik ortalyǵynda 14 nysannyń qurylys jumystary aiaqtalǵan, – dep habarlaidy "Ult aqparat".
«Bul eń aldymen halqymyzdyń turmys-jaǵdaiyn odan ári jaqsartyp, oblystyń ekonomikalyq qýatyn arttyrary sózsiz. Bizdiń maqsat – Memleket basshysynyń Joldaýynda kórsetilgen ártaraptandyrylǵan jáne tehnologiialyq damyǵan ekonomikany qurý bolmaq. Qazirgi tańda ákimshilik-iskerlik ortalyǵynda salynyp jatqan áleýmettik nysandar men turǵyn úilerge 53 shaqyrym injenerlik infraqurylym tartylýda. Al, rýhani-mádeni ortalyǵynda 10 nysannyń qurylys jumystary júrgizilip, onyń ishinde 6 nysan paidalanýǵa berilgen», - dedi oblys ákimi Ómirzaq Estaiuly.
Aita keteiik, qalada Tuńǵysh Prezident saiabaǵy, N.Nazarbaev alleiasy (Arbat), Q.A.Iasaýi men Rábiia Sultan Begim kesenelerin qalpyna keltirý, Áziret Sultan qoryq murajaiynyń aýmaǵyn abattandyrý, Kúltóbe kóne qonysynyń tarihi oryndaryn qalpyna keltirý, Respýblikamyzdaǵy alǵash «Halyqaralyq týrizm jáne meimandostyq ýniversiteti», jelilik saiabaq, dendrosaiabaq jáne jeke salymshylar tarapynan «Kerýen - Sarai» kesheni, 3 halyqaralyq standartqa sai qonaq úi, meshit syndy iri jobalardyń qurylystary qarqyndy júrip jatyr.
«Óńirdiń áleýeti men týrizm salasyn kóteretin birden-bir iri memlekettik-jeke áriptestik aiasynda júrgizilip jatqan Túrkistan qalasynyń halyqaralyq áýejaiynyń qurylysyn atap ótýge bolady. Atalǵan joba 2019 jyldyń shilde aiynda bastalyp, aǵymdaǵy jyldyń qyrkúiek aiynda tehnikalyq bóligi iske qosyldy. 2020 jyldyń 1 jeltoqsanynan bastap Almaty jáne Nur-Sultan qalalarynan Túrkistan qalasyna áýe reisteri ushýdy bastaidy. Budan bólek, ákimshilik iskerlik ortalyǵynda jalpy aýdany 773,6 myń sharshy metr nemese 9 052 páterdi quraityn 177 kóp qabatty turǵyn úidiń qurylysy júrip jatyr. Jyl qorytyndysy boiynsha 40 úidiń qurylysy aiaqtalyp, 1 822 páter paidalanýǵa beriledi», - dedi Ómirzaq Shókeev.
