«Áleýmettik meditsinalyq saqtandyrý qory» kommertsiialyq emes AQ basqarma tóraǵasy Aibatyr Jumaǵulov 1 shildege deiingi shartty meditsinalyq saqtandyrý talaptaryn túsindirdi, dep habarlaidy "Ult aqparat".
«1 sáýirden bastap, Mindetti áleýmettik meditsinalyq saqtandyrý júiesi tolyq iske qosylýy kerek edi. Alaida, koronavirýs indetine bailanysty tótenshe jaǵdai kezinde Prezident Qasym-Jomart Toqaev arnaiy tapsyrma berdi. Osy tapsyrmaǵa sáikes, 1 sáýir men 1 shilde aralyǵynda barlyq turǵyndar óziniń áleýmettik nemese saqtandyrý mártebesine qaramastan, kez kelgen tegin meditsinalyq kepildendirilgen kómek pen MÁMS júiesindegi meditsinalyq kómekti ala alady», - dedi A. Jumaǵulov Ortalyq kommýnikatsiialar qyzmetinde ótken brifingte.
Qor basshysynyń aitýynsha, 1 sáýir men 1 shilde aralyǵynda kez kelgen qazaqstandyq shartty túrde saqtandyrylǵan bolyp sanalady. Iaǵni, kez kelgen qazaqstandyq Mindetti áleýmettik saqtandyrý júiesi men Tegin meditsinalyq kepildendirilgen kómek tarapynan qyzmet alýǵa quqyly.
«Bul - shamamen 2,5 mln astam azamatty qoldaý júiesi. Ekonomikalyq jaǵdaiǵa bailanysty bul kórsetkish áli de kóbeiýi múmkin. Bul baǵytta qor tarapynan 20 mlrd astam teńge qarastyrylyp otyr. Bul qarajat qordyń ishki rezervterinen alynady», - dedi A. Jumaǵulov.
