Qazaqstandyqtardyń kóbi kommýnaldyq shyǵyndardy memleket esebinen sýbsidiialaýǵa bolatynyn bilmeidi. Iaǵni, 1 miliionǵa jýyq adam óz quqyǵyn paidalanbai júr, dep habarlaidy QazAqparat.
Energetika vitse-ministri Qairat Rahimov ortalyq kommýnikatsiialar qyzmetinde osyndai málimet aitty.
«Halyqtyń áleýmettik turǵyda álsiz toptaryna turǵyn úi zańnamasy boiynsha shyǵyndardy jeńildetýdiń tetigi qarastyrylǵan. Kórip júrgenimizdei, halyqtyń kóbi áleýmettik qoldaýdyń tikelei sýbsidiialaý deitin túri bar ekenin bilmeidi de» - dedi ministrlik ókili.
Qairat Rahimov atalmysh qoldaýǵa quqyly adamdar halyqqa qyzmet kórsetý ortalyqtary arqyly nemeses eGov elektrondy júiesi arqyly ótinish bere alatynyn aitady.
Osy qyzmetter arqyly otbasynyń áleýmettik mártebesin dáleldeitin qujattar men kommýnaldyq tólem túbirtegin ótkizý qajet.
«Mysaly bir otbasynda 4 adam boldy deiik. Tek bireýi ǵana jumys isteýi múmkin. Onyń ailyq tabysy 100 myń teńge bolsa, jan basyna shaqqanda 25 myń teńgeden keledi. Al qazir minimaldy eseptik kórsetkish kólemi 34 myń teńge ekenin eskersek, bul januianyń jan basyna shaqqandaǵy tabysy normadan tómen degen sóz. Sondyqtan bul otbasy memleket tarapynan áleýmettik qoldaý talap etýge quqyly», - deidi vedomstvo ókili.
Mundaǵy basty nazar aýdaratyn másele - ár óńirde kommýnaldyq shyǵyn sýbsidiiasynyń kólemi ártúrli bolýy múmkin.
«Jergilikti máslihattar áleýmettik az qamtylǵan otbasylardyń kommýnaldyq qyzmet aqysyna tóleitin maksimaldy shekti bekitedi. Mysaly, Almatyda ol otbasy tabysynyń 5 paiyzynan aspaýy kerek. Iaǵni, aiyna 100 myń teńge kiris kiretin otbasy osy Almatyda turatyn bolsa jáne kommýnaldyq qyzmetterge aiyna 10 myń teńge tóleýi kerek bolsa, onyń teń jartysyn memleket tikelei sýbsidiialaidy», - deidi Qairat Rahimov.
Vitse-ministr zań boiynsha elimizde osyndai qoldaý túri 1 millionnan astam otbasyna kórsetilýi kerek dep otyr. Biraq kóbi mundai sýbsidiianyń bar ekenin bilmeidi.
«Men nege osy qoldaýdy kóbi bilmeýi múmkin dedim? 2019 jyly respýblika boiynsha 54 myń otbasy ǵana osy tólemge ótinish bergen. Al byltyr ótinish sany 36 myńnan asqan joq. Eńbek jáne halyqty álemýettik qorǵaý ministrligimen birge osy máseleni qaraǵanbyz. Atalmysh sanat boiynsha áleýmettik qoldaýǵa quqyly abonentterdiń sany 1 milionnan asady. Bizdiń ministrlik endi osy qoldaý sharasyn avtomattandyrý máselesin qarap jatyr», - dedi ministrdiń orynbasary.
