1 maýsymdaǵy jaǵdai boiynsha qazaqstandyqtarǵa 1,2 trln teńgeden astam somadaǵy zeinetaqy tólendi, dep habarlaidy Eńbek jáne halyqty áleýmettik qorǵaý ministrligi.
"2022 jylǵy mamyrda zeinetaqy tólemderine respýblikalyq biýdjetten 235,4 mlrd teńgeden astam, onyń ishinde bazalyq zeinetaqyny tóleýge – 71,3 mlrd teńge, yntymaqty zeinetaqyny tóleýge – 163,2 mlrd teńge bólindi.
1 maýsymdaǵy jaǵdai boiynsha zeinetkerler sany - 2 mln 246 myń adam. Sondai-aq, 1 maýsymdaǵy jaǵdai boiynsha zeinetaqy tólemderiniń ortasha mólsheri (bazalyq zeinetaqy tólemin eskere otyryp) 105 189 teńge boldy" delingen habarlamada.
Ministrlik 1 shildeden bastap memlekettik bazalyq zeinetaqy tólemi zeinetaqy júiesindegi ótilin eskere otyryp, ár alýshyǵa jeke taǵaiyndalatynyn eske saldy.
"Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder zeinetaqy júiesindegi eńbek ótiline qosylady.
Eger azamattyń zeinetaqy júiesindegi ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54%-yn quraidy, sodan keiin 10 jyldan asqan ár jyl úshin onyń mólsheri 2%-ǵa artady. Mysaly, eger sizdiń ótilińiz 20 jyl bolsa, bazalyq zeinetaqy tómengi kúnkóris deńgeiiniń 74%-yn, al 30 jyl bolsa, onda 94%-yn quraidy. Eńbek ótili 33 jyl nemese odan kóp bolsa, kúnkóris deńgeiiniń eń joǵarǵy mólsherinde belgilenedi.
Eger bir ai ishinde mindetti zeinetaqy jarnalary Biryńǵai jinaqtaýshy zeinetaqy qoryna birneshe ret aýdarylsa, jinaqtaýshy júiege qatysý merzimi bir aidy quraidy.
Osylaisha mindetti zeinetaqy jarnalary neǵurlym turaqty jáne tolyq kólemde aýdarylatyn bolsa, zeinet jasyna jetkende bazalyq zeinetaqy tólemderiniń mólsheri soǵurlym kóp bolady. Óz kezeginde azamattyń jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńdegi ortasha ailyq tabysyna bailanysty bolady" - delingen vedomstvo aqparatynda.
