2021 jyldyń 1 mamyrynan erikti jarna boiynsha jeke zeinetaqy shotyn ashýǵa BJZQ-ǵa túsken alǵashqy erikti zeinetaqy jarnasy (EZJ) negiz bolyp tabylady, dep habarlaidy "Ult aqparat" Biryńǵai jinaqtaýshy zeinetaqy qorynyń baspasóz qyzmetine silteme jasap.
«Erikti zeinetaqy jarnasy salymshynyń – jeke tulǵanyń óz kirisinen óziniń paidasyna aýdarǵan somasy ne salymshynyń (jeke nemese zańdy tulǵanyń) alýshynyń paidasyna aýdarǵan somasy bolýy múmkin. Bul rette jarnalardyń mólsheri men merzimdiligin salymshy ózi aiqyndaidy.
Atap ketý kerek, jeke tulǵa óz kirisinen óziniń paidasyna EZJ aýdarǵan kezde salyq zańnamasynda tólengen EJZ somasyna salyq shegerimi qarastyrylǵan», delingen habarlamada.
Budan bólek, 2021 jyldyń 1 qańtarynan bastap salyq agentiniń (jumys berýshiniń) jeke qarajaty esebinen jumyskerdiń paidasyna tólegen EZJ-sy korporativti tabys salyǵyn tóleý kezinde shegerilimge jatady. Sol ýaqytta jumys berýshiniń jumyskerdiń paidasyna tólegen EZJ somalary jumyskerdiń kirisine salyq salý kezinde esepke alynbaidy.
«Osylaisha jumys berýshi óz jumyskerleriniń paidasyna EZJ tólei otyryp, salyq salý kezinde jeńildikterge, sondai-aq, óz qyzmetkerlerin yntalandyrýda qosymsha quralǵa ie bolady. Jumysker úshin bul BJZQ-da EZJ esebinen qalyptasqan zeinetaqy jinaqtary somasynyń ósýi, sáikesinshe, Qordan tólenetin zeinetaqy tólemderi mólsheriniń kóbeiýi retinde oń sipat alady», delingen habarlamada.
Erikti zeinetaqy jarnalaryn ekinshi deńgeidegi bankiler (EDB) ne «Qazposhta» AQ bólimsheleri arqyly aýdarýǵa bolady. Ekinshi deńgeidegi birqatar bankiler EZJ onlain (mobildi qosymsha nemese ózin-ózi qyzmet kórsetý terminaldary) arqyly aýdarýǵa múmkindik beredi. Budan bólek, óz paidasyna EZJ jarnalaryn turaqty aýdarý úshin jumys berýshiniń atyna ótinish jazýǵa da bolady. Sonyń negizinde jumys berýshi EZJ ótinish iesiniń ne úshinshi tulǵanyń paidasyna BJZQ-ǵa turaqty túrde aýdaryp otyrady.
Bul rette paidasyna EZJ aýdarylyp turatyn jeke tulǵany sáikestendirý, EZJ tóleý barysynda elektrondyq formattaǵy tólem tapsyrmasynda kórsetilgen jeke derekteri (aty-jóni, JSN, týǵan kúni) boiynsha oryndalatyn bolady. Jeke basyn kýálandyratyn qoldanystaǵy qujattyń derektemeleri, turǵylyqty mekenjaiy, ózge de derekteri týraly barlyq qajetti málimetti BJZQ memlekettik organdardyń aqparattyq júiesinen alady.
