2020 jyldyń 1 sáýirinen bastap Atyraý stansasyna baratyn jáne odan shyǵatyn barlyq poiyzdarǵa bilet satý, jolaýshylardy otyrǵyzý jáne túsirýge tyiym salynady, dep habarlaidy "Ult aqparat" «Jolaýshylar tasymaly» AQ baspasóz qyzmetine silteme jasap.
31 naýryzdan bastap № 692/691 «Aqtóbe-Atyraý» poiyzynyń marshrýty Dossor stansasyna deiin qysqarady. 1 sáýirden bastap №313/314 «Atyraý-Mańǵystaý» jáne №47/48 «Atyraý-Býrabai kýrorty» jolaýshylar poiyzy, 2 sáýirden bastap №41/42 «Atyraý-Shý» poiyzynyń qozǵalysy toqtatylady.
Buǵan deiin Atyraýǵa deiin jáne odan shyǵatyn poiyzdarǵa bilet alǵan jolaýshylar jol júrý qujattaryn qaitaryp, aqshalai qarajatty tolyqtai ala alady.
«Eske salaiyq, Qazaqstanda 2020 jyldyń 16 naýryzynan bastap tótenshe jaǵdai engizildi jáne osyǵan bailanysty jolaýshylardyń engizilgen shekteýlerge túsinistikpen qarap, koronavirýs infektsiiasy taralýynyń aldyn alý boiynsha barlyq sharalardy saqtaýyn suraimyz», - delingen habarlamada.
